ඉලංගෙයි තමිල් අරසු පක්ෂයට හිමි ජාතික ලැයිස්තු මන්ත්‍රී ධුරයට එම පක්ෂයේ ලේකම් වෛද්‍ය පද්මනාදන් සත්‍යලිංගම් නම් කිරීමට තීරණය කර තිබෙනවා.
අද (17) දිනයේ රැස් වූ එම පක්ෂයේ විධායක කමිටුව විසින් මෙම තීරණය ගනු ලැබූ බවයි හිටපු පාර්ලිමේන්තු මන්ත්‍රී එම්.ඒ. සුමන්තිරන් සඳහන් කළේ.
මෙවර මහ මැතිවරණයෙන් එම පක්ෂයට ලැබුණ ජාතික ලැයිස්තු මන්ත්‍රී ධුරයට නම් කිහිපයක් ඉදිරිපත්ව තිබූ අතර, ඒ සම්බන්ධයෙන් අවසන් තීරණයක් ගැනීම සඳහා එම පක්ෂයේ විධායක සහ දේශපාලන කමිටුව ඊයේ (16) වවුනියාවේදී රැස් වුණා.
මේ සම්බන්ධයෙන් දීර්ඝ ලෙස සාකච්ඡා කිරීමෙන් අනතුරුව මෙවර මහ මැතිවරණයේ ඉලංගෙයි තමිල් අරසු පක්ෂයෙන් වන්නි දිස්ත්‍රික්කයට තරඟ කළ වෛද්‍ය පද්මනාදන් සත්‍යලිංගම් ඒ සඳහා පත් කිරීමට යෝජනා වී තිබෙනවා.
මෙවර මහ මැතිවරණයෙන් ඉලංගෙයි තමිල් අරසු පක්ෂ මන්ත්‍රී ආසන 07ක් ජයග්‍රහණය කළ අතර, ඒ වෙනුවෙන් ඔවුන්ට එක් ජාතික ලැයිස්තු මන්ත්‍රී ධුරයයක් හිමිවුණා.
