සාකච්ඡා සඳහා මොස්කව් වෙත පැමිණ සිටින ඉරාන විදේශ අමාත්ය අබ්බාස් අරග්චි, රුසියානු ජනාධිපති ව්ලැඩිමීර් පුටින් සමඟ “පොදු අභියෝග සහ තර්ජන” පිළිබඳව වැදගත් සාකච්ඡාවක් අද දිනයේ පැවැත්වීමට නියමිත බව විදෙස් වාර්තා පවසනවා.
මෙම සාකච්ඡා වේ වෙනුවෙන් ඉරාන විදේශ අමාත්යවරයා ඊයේ දිනයේ දී මොස්කව් වෙත පැමිණියා.
ඉරාන න්යෂ්ටික මධ්යස්ථානවලට එල්ල කරන ලද ඇමරිකානු ප්රහාර රුසියාව හෙළා දැක ඇති අතර, එක්සත් ජාතීන්ගේ සංවිධානයේ රුසියානු තානාපතිවරයා කියා සිටියේ ඇමරිකාව “පැන්ඩෝරා පෙට්ටියක් විවෘත කර ඇති” බවයි.
ඉරාන විදේශ අමාත්ය අබ්බාස් අරග්චි අද පුටින් ජනාධිපතිවරයා හමුවුවහොත්, ඔහුට ක්රෙම්ලිනයේ නායකයාගෙන් දැඩි සහයෝගයක් ලැබෙනු ඇති නමුත්, මොස්කව් වෙතින් මිලිටරි ආධාර ලබාගැනීමට නොහැකි බව පෙනී යන බවයි විදෙස් වාර්තා සඳහන් කරන්නේ.
මේ මොහොතේ රුසියාවේ ප්රමුඛතාවය යුක්රේන යුද්ධය වෙත ලබාදී තිබීම ඊට හේතු වී ඇති අතර, රුසියාව සහ ඉරානය උපායමාර්ගික හවුල්කාරිත්ව ගිවිසුමක් ඇති නමුත් එය ආරක්ෂක ගිවිසුමක් නොවන අතර ටෙහෙරානයට මිලිටරි සහාය ලබාදීමට මොස්කව් බැඳී නැහැ.
පසුගිය සතියේ පුටින් කියා සිටියේ ඉරානය මොස්කව් වෙතින් මිලිටරි සහාය ඉල්ලා නොමැති බවත්, ඔහු කිසිවක් ලබාදීමට ඉක්මන් නොවන බවයි.
ඉරානය සහ ඊශ්රායලය යන රටවල් දෙකම සමඟ හොඳ සබඳතා පවත්වා ගැනීමට සහ ඩොනල්ඩ් ට්රම්ප් සමඟ හොඳ වැඩ කරන සම්බන්ධතාවයක් ගොඩනඟා ගැනීමට ක්රෙම්ලිනය මේ වනවිට උනන්දු වී තිබෙනවා.
