ජාතික ආරක්ෂක උපදේශක අජිත් දොවාල් සැප්තැම්බර් 18 වන දින නවදිල්ලියේදී කැනඩාවේ ජාතික ආරක්ෂක සහ බුද්ධි උපදේශක නතාලි ජී. ඩ්රොයින් හමුවූ බව විදේශ කටයුතු අමාත්යාංශය නිවේදනය කළා.
මෙම සංචාරය දෙපාර්ශ්වය අතර නිතිපතා ද්විපාර්ශ්වික ආරක්ෂක සංවාදයේ කොටසක් වූ අතර කැනඩාවේ ඇල්බර්ටා හි කනනාස්කිස් හි පැවති G7 සමුළුවට සමගාමීව අගමැති මෝදි සහ අගමැති කාර්නි අතර පැවති සාකච්ඡාවල අනුප්රාප්තියක් ලෙස ද සැලකෙනවා.
දේශපාලන නායකත්වයේ ඉහළම මට්ටම්වල විශ්වාසය නැවත ගොඩනැගීම සහ සහයෝගීතාව පුළුල් කිරීම සඳහා පැහැදිලි ගම්යතාවයක් දෙපාර්ශ්වයම පිළිගත් බව නිවේදනයේ සඳහන්.
ත්රස්තවාදයට එරෙහිව සටන් කිරීම, අන්තර්ජාතික සංවිධානාත්මක අපරාධ සහ බුද්ධි හුවමාරු ඇතුළු ද්විපාර්ශ්වික සම්බන්ධතාවය ඉදිරියට ගෙන යාම පිළිබඳව ඔවුන් ඵලදායී සාකච්ඡා පැවැත්වූ බවත් ආරක්ෂක සහයෝගීතාව ශක්තිමත් කිරීමට සහ පවතින සම්බන්ධතා යාන්ත්රණයන් ශක්තිමත් කිරීමට ඔවුහු එකඟ වූ බවත් විදේශ අමාත්යංශය නිකුත් කළ නිවේදනයේ දැක්වුණා.
එහි වැඩිදුරටත් දැක්වුණේ අනාගත සහයෝගීතාව සඳහා ප්රමුඛතා ක්ෂේත්ර පිළිබඳව ද ජාතික ආරක්ෂක උපදේශකවරුන් දෙදෙනා සාකච්ඡා කළ අතර කලාපීය සහ ගෝලීය වර්ධනයන් පිළිබඳ අදහස් හුවමාරු කර ගත් බවයි.
ඉදිරි මාවතේ සමීපව කටයුතු කිරීමට සහ ද්විපාර්ශ්වික සබඳතාවල නව පරිච්ඡේදයක් සඳහා සහයෝගී ප්රවේශයක් අනුගමනය කිරීමට දෙපාර්ශ්වයම එකඟ වූ බව ද විදේශ අමාත්යංශය සඳහන් කළා.
