ඉතාලියේ ලැම්පෙඩුසා දූපතට ඔබ්බෙන් වූ ප්රදේශයේදී අනවසර සංක්රමණිකයන් රැගත් යාත්රාවක් අනතුරට ලක්වීමෙන් පුද්ගලයන් 41 දෙනෙකු ජිවිතක්ෂයට පත්වී තිබෙනවා.
ටියුනීසියාවේ ස්ෆැක්ස් සිට ඉතාලිය බලා යමින් සිටියදී මෙම යාත්රාව ගිලී ගිය බවයි එහි සිට දිවි ගලවා ගත් සිව් දෙනෙකු සහන කණ්ඩායම් වෙත ප්රකාශ කර ඇත්තේ.
දිවි ගලවා ගත් හතර දෙනා, අයිවරි කෝස්ට් සහ ගිනියා යන රටවලින් පැමිණි පිරිසක්.
පිරිමි තිදෙනෙකු සහ කාන්තාවක් වන ඔවුන් පැවසුවේ ළමයින් තිදෙනෙකු ඇතුළු පුද්ගලයින් 45 දෙනෙකු අනතුරට පත්වූ බෝට්ටුවේ සිටි බවයි.
ඔවුන් පැවසුවේ අඩි 20ක් පමණ දිග බෝට්ටුව පසුගිය සතියේ බ්රහස්පතින්දා Sfax වෙතින් පිටත් වූ අතර විශාල රළකට හසුවීමෙන් එය ගිලී ගිය බවයි.
එහි ගමන් කළ පිරිස අතුරින් ජීවිතාරක්ෂක කබා පැළඳ සිට ඇත්තේ 15 දෙනකු පමණක් බව ද තොරතුරු ලැබී තිබෙනවා.
භාණ්ඩ ප්රවාහන නෞකාවක් මගින් මෙම පිරිස බේරාගෙන පසුව ඉතාලි වෙරළාරක්ෂක යාත්රාවකට මාරු කර යවා ඇති බවයි ඔවුන් වැඩිදුරටත් කියා සිටියේ.
විදෙස් මාධ්ය වාර්තා පෙන්වා දෙන්නේ උතුරු අප්රිකාවේ සිට යුරෝපයට යන මෙවැනි අනවසර ගමන්වලදී මේ වසරේ මේ දක්වා කාලය තුළ 1800කට වැඩි පිරිසක් ජීවිතක්ෂයට පත්ව ඇති බවයි.
ටියුනීසියානු බලධාරීන් පවසන්නේ ලැම්පෙඩුසා සිට සැතපුම් 80ක් (130km) පමණ දුරින් පිහිටි වරාය නගරයක් වන Sfax යුරෝපයේ ආරක්ෂාව සහ යහපත් ජීවිතයක් අපේක්ෂා කරන සංක්රමණිකයන් සඳහා ජනප්රිය ගමනාන්තයක් බවයි.
එලෙස පැමිණෙන පිරිස් අතරින් අනතුරට ලක්වූ 2000ක පමණ පිරිසක් ගතවූ දිනවලදී ඉතාලි මුර යාත්රා සහ සහන කණ්ඩායම් විසින් බේරාගෙන තිබෙනවා.
ටියුනීසියාව තුළ පසුගිය මාස කිහිපය තුළ වර්ධනය වූ කළු අප්රිකානුවන්ට එරෙහි වර්ගවාදී ගැටුම් හේතුවෙන් මෙලෙස රට හැර යාමට උත්සාහ කිරීම වැඩි වී ඇති බවයි විදෙස් වාර්තා පෙන්වා දෙන්නේ.
එක්සත් ජාතීන්ගේ සංවිධානය විසින් 2014 වසරේ සිට මධ්යම මධ්යධරණී මුහුදේ මරණ සහ අතුරුදහන්වීම් 17,000කට වඩා ලියාපදිංචි කර ඇති අතර එය ලෝකයේ වඩාත්ම භයානක සංක්රමණික මාර්ගය බවට පත් කර තිබෙනවා.
