එක්සත් රාජධානියේ රාජකීය පවුලේ ඈන් කුමරිය නිල සංචාරයක් සඳහා ශ්රී ලංකාවට පැමිණ තිබෙනවා.
ඇය මෙම සංචාරය සදහා ශ්රී ලන්කන් ගුවන් සේවයේ යානයක් තෝරා ගෙන තිබීම විශේෂත්වයක්.
පස්වරු 01.06ට ලන්ඩන් නුවර හීත්රෝ ගුවන් තොටුපොළේ සිට පැමිණි ශ්රී ලන්කන් ගුවන් සේවයේ UL- 504 දරන ගුවන් යානයෙන් කුමරිය කටුනායක ගුවන් තොටුපොළ වෙත පැමිණියා.
ශ්රී ලංකාව සහ එක්සත් රාජධානිය අතර රාජ්යතාන්ත්රික සබඳතාවල 75 වැනි සංවත්සරය හා සම්බන්ධ උත්සව සඳහා සහභාගී වීමට ශ්රී ලංකා රජය ඈන් කුමරියට ආරාධනා කර තිබෙනවා.
ඒ වෙනුවෙනුයි ඇය මෙම සංචාරයට එක්වන්නේ.
කුමරිය සමඟ ඇයගේ ස්වාමිපුරුෂයා වන වයිස් අද්මිරාල් ශ්රීමත් ටිම් ලෝරන්ස් මහතා ද පැමිණ තිබෙනවා.
ඔවුන් ලබන 13 වනදා දක්වා ශ්රී ලංකාවේ සංචාරය කිරීමට නියමිතයි.
අප වාර්තාකරුවන් සඳහන් කළේ මෙම සංචාරය හේතුවෙන් කටුනායක ගුවන්තොටුපළ අවට දැඩි ආරක්ෂාවක් ද යොදවා ඇති බවයි.
මෙම පිරිස පිළිගැනීම සදහා විදේශ අමාත්යවරයා, ශ්රී ලංකාවේ බ්රිතාන්ය මහ කොමසාරිස් කාර්යාලයේ නිලධාරීන් පිරිසක් එක්ව තිබෙනවා.
ඊට අමතරව මීගමුව හරිස්චන්ද්ර, නිවුස්ටෙඩ් බාළිකා, විජයරත්නම් සහ අල් හිල්ලාල් ජාතික පාසැල්වල සිසුන් පිරිසක් සහ උඩරට – පහතරට විවිධ නැටුම් අංග නියෝජනය කරමින් විශාල නැටුම් ශිල්පීන් පිරිසක් ද කටුනායක ගුවන් තොටුපොළ ගුවන් යානා අංගය වෙත පැමිණ සිටියා.
ගුවන් යානයෙන් බැස පැමිණි ඈන් කුමරිය රතු පළස ඔස්සේ පැමිණ ගුවන් තොටුපොළ රන් සමරු සටහන් පොතේ
(Golden Book)හි සටහනක් තබා ගුවන් තොටුපොළ අති විශේෂ අමුත්තන්ගේ මැදිරිය වෙත සම්ප්රාප්ත වුණා.
එහිදී පැවැත් වූ තේ පැන් සංග්රහයකින් පසු විශේෂ රිය පෙරහැරකින් කටුනායක නිදහස් වෙළෙඳ කළාපයේ පිහිටි ඇඟලුම් කම්හලක් නිරීක්ෂණයට ද පැමිණ තිබෙනවා.
මෙම කම්හල තුළ පැයක පමණ කාළයක් නිරීක්ෂණය කිරීමෙන් අනතුරුව රාජකීය කුමරිය කොළඹ බලා පිටත්ව යාමට නියමිතයි.
1995 වසරේ දී ඈන් කුමරිය මෙරටට පැමිණ ඇති අතර ඇයගේ මෙම ශ්රී ලංකා සංචාරය 2024 වසරේදී බ්රිතාන්ය රාජකීය පවුලේ සාමාජිකයෙකු සිදු කරන පළමු විදෙස් සංචාරය ද වනවා.
ඈන් කුමරිය දෙවන එලිසබෙත් රැජිනගේ සහ එඩින්බරෝ ආදිපාදවරයා වන පිලිප් කුමරුගේ දෙවන දරුවා සහ එකම දියණිය ද වන අතර III චාල්ස් රජුගේ එකම සහෝදරියයි.
එක්සත් රාජධානිය සහ ශ්රී ලංකාව අතර පවතින ශක්තිමත් සබඳතාව, පොදු අරමුණු සහ පොදුරාජ්ය මණ්ඩලීය හවුල්කාරීත්වය මත මෙම සංචාරය පදනම් වනවා.
ඈන් කුමරිය ජනාධිපති රනිල් වික්රමසිංහ මහතා හමුවීමට ද නියමිතව තිබෙනවා.
සංචාරය අතරතුර ව්යාපාර සමාජ සේවා සහ පුණ්ය පදනම්වල නියෝජිතයන් හමුවීමටත් Save The Children වැඩසටහන නිරීක්ෂණය කිරීමටත් සැලසුම් කර ඇතැයි සඳහන්.
පොදු රාජ්ය මණ්ඩලීය යුද සොහෙන්හි (Commonwealth War Graves) සභාපතිනිය ලෙසට ඇයගේ නව භූමිකාව යටතේ පොදු රාජ්ය මණ්ඩලීය යුද සුසාන භූමියක සංචාරය කිරීමට ද නියමිතයි.
රාජකීය කුමරිය මහනුවර සහ කොළඹ වැදගත් ආගමික ස්ථානවලට ගොස් ගෞරව දැක්වීමට ද යාපනයේ සංචාරය කරන අතරතුර ප්රජාව සහ සිවිල් සමාජ නියෝජිතයන් හමුවීමට ද නියමිතව තිබෙනවා.
රාජකීය කුමරිය මීට පෙර 1995 වසරේ මාර්තු මාසයේදී Save The Children හි අනුශාසක ලෙස ශ්රී ලංකාවට පැමිණියේ එම පුණ්ය පදනම සහාය දක්වන ව්යාපෘති පිළිබඳ වැඩිදුර තොරතුරු දැන ගැනීම සඳහායි.
