දිගු කලෙක සිට පාකිස්තානයේ ජීවත් වෙමින් සිටි ඇෆ්ගන් ජාතිකයින් ව එම රටෙන් නෙරපා හරිමින්, බලහත්කාරයෙන් යළි ඔවුන්ගේ මව් රට වෙත පිටත් කර හැරීමේ ක්‍රියාවලියට ජාත්‍යන්තරයෙන් දැඩි දෝෂාරෝපණයක් එල්ල වී තිබෙනවා.
එක්සත් ජාතීන්ගේ සංවිධානය, අයිතිවාසිකම් සුරැකීමේ කණ්ඩායම් රැසක් පාකිස්තානු රජයට සිය අප්‍රසාදය එල්ල කර ඇති බවයි පාකිස්තාන වෙබ් අඩවි වාර්තා කර ඇත්තේ.
මෙම පියවර මානව හිමිකම් සංවිධාන, ජාත්‍යන්තර ආයතන සහ සිවිල් සමාජ කණ්ඩායම්වල පුළුල් කනස්සල්ලට හේතු වී තිබීමත්; දශක ගණනාවක සිට පකිස්තානයේ ජීවත් වූ ඇෆ්ගන් ජාතිකයින් බොහෝ දෙනෙකුට ඇෆ්ගන් පුරවැසි කාඩ්පත් (ACC) හෝ ලියාපදිංචි කිරීමේ සාක්ෂි (PoR) කාඩ්පත් වැනි නීත්‍යනුකූල පදිංචි ලියකියවිලි ද ඇති පසුබිමක මෙය සිදුවීම ද දැඩි විවේචනයට හසු ව තිබෙනවා.
එක්සත් ජාතීන්ගේ සරණාගත ඒජන්සිය (UNHCR) ට අනුව, මාර්තු 31 වන දිනට පෙර ACC සහිත ඇෆ්ගන් ජාතිකයින් 800,000කට පමණ පිටව යන ලෙස පකිස්තාන රජය නියෝග කර තිබෙන බවත් වාර්තා වනවා.
එම නියෝගය ප්‍රකාරව ක්‍රියා නොකරන්නන්ව පිටුවහල් කිරීමට ලක් කරන බවයි වාර්තා වන්නේ.
අවම වශයෙන් පුද්ගලයින් 8,906 දෙනෙකු රටින් බලහත්කාරයෙන් ඉවත් කර තිබෙනවා.
එක්සත් ජාතීන්ගේ සංවිධානය සහ අනෙකුත් මානුෂීය සංවිධාන, ක්‍රියාවලියේ විනිවිදභාවයක් නොමැතිකම සහ ජාත්‍යන්තර සරණාගත ආරක්ෂණ සම්මතයන් උල්ලංඝනය කිරීමේ විභවය, විශේෂයෙන් පුද්ගලයින් අනතුරට මුහුණදිය හැකි ආකාරයේ සිදුවීම් හේතුවෙන් මෙම ක්‍රියාවලිය දැඩි ලෙස විවේචනයට ලක් කර ඇති බවයි පැවසෙන්නේ.
ඇම්නෙස්ටි ඉන්ටර්නැෂනල් හි දකුණු ආසියාව සඳහා නියෝජ්‍ය කලාපීය අධ්‍යක්ෂ ඉසබෙල් ලැසී සඳහන් කර ඇත්තේ, “ඇෆ්ගන් සරණාගතයින් සහ සරණාගතයින් ඉවත් කිරීම සඳහා පකිස්ථාන රජයේ අවසාන දිනය ජාත්‍යන්තර මානව හිමිකම් නීතියට ගරු කිරීමක් පෙන්නුම් නොකරයි. අපැහැදිලි විධායක නියෝග අවතැන් වූ ජනගහනයේ අයිතිවාසිකම් ආරක්ෂා කිරීම සඳහා පූර්ව කැපවීම්වලට පටහැනි වේ..”යනුවෙනි.
