2023 එක්දින ලෝක කුසලාන තරගාවලියේ ශ්‍රී ලංකාව මුහුණදෙන මීළඟ තරගය අද (02) ඉන්දියාව එරෙහිව පැවැත්වෙනවා.
මුම්බායි හි වන්කඩේ ක්‍රීඩාංගණයේ දී පැවැත්වෙන මෙම තරග එක්සත් ජාතීන්ගේ ලෝක ළමා අරමුදල වෙනුවෙන් වෙන්කර තිබීම විශේෂත්වයක්.
මේ අතර ඉන්දීය ප්‍රිමියර් ලීග් තරගාවලිය නියෝජනය කරන රෝයල් චැලෙන්ජස් බැංගලෝර් පිළ, අද තරගය පිළිබඳව ශ්‍රී ලංකාවට උපහාසාත්මක අයුරින් පොස්ටුවක් පළකර ඇති ආකාරය දැකගත හැකි වුණා.
රෝයල් චැලෙන්ජස් බැංගලෝර් පිළේ නිල ෆේස්බුක් පිටුවේ ඊයේ රාත්‍රියේ මෙම පොස්ටුව පළකර තිබූ අතර, මේ සම්බන්ධයෙන් ශ්‍රී ලංකාවේ සහ ඉන්දියාවේ ප්‍රේක්ෂකයින් අතර දැඩි කතාබහක් මතුව තිබෙනවා.
“හැලොවීන් අවසන් නමුත් සමහර බියකරු සිහින සැමවිටම ඔබව හොල්මන් කරයි, සුභ රාත්‍රියක් අසල්වැසියනි හෙට හමුවෙමු” යනුවෙන් අදාළ පොස්ටුවේ දැක්වනවා.
මේ අතර අයි.පී.එල්. තරගාවලිය ආරම්භ වූ 2008 වසරේ සිට මේ දක්වා අයි.පී.එල්. ශූරතාවක් හිමිකරගෙන නොමැති රෝයල් චැලෙන්ජස් බැංගලෝර් වැනි කණ්ඩායමක් මෙවැනි පොස්ටුවක් පළ කිරීම හාස්‍යජනවන බව බොහෝ දෙනෙක් පවසනවා.
