පසුගිය දා කොවිඩ් වෛරසය ආසාදනය වී මරණයට පත් වූ දින 21ක් වයසැති බිළිඳෙකු ආදාහනය කිරීමේ සිද්ධිය පිළිබඳව විමර්ශනයක් පවත්වන්නැයි සෞඛ්‍ය බලධාරීන් වෙත නියෝගයක් නිකුත් කරන මෙන් ඉල්ලා ගොනුකර ඇති මුලික අයිතිවාසිකම් පෙත්සමට අදාළ සීමිත විරෝධතා ඉදිරිපත් කිරීම සඳහා ශ්‍රේෂ්ඨාධිකරණය අද ( 22) නීතිපතිවරයාට කල් ලබා දී තිබේ.
අදාළ පෙත්සම සලකා බැලීම සඳහා අද ප්‍රියන්ත ජයවර්ධන, එල්.ටී. බී දෙහිදෙණිය, යසන්ත කෝදාගොඩ සහ ඒ.එච්.එම්.ඩී නවාස් යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී පෙත්සම්කාර පාර්ශ්වය වෙනුවෙන් පෙනීසිටින ජනාධිපති නීතිඥ ෆයිසර් මුස්තාෆා මහතා මේ දිනවල අසනීප තත්ත්වයෙන් පසු වන හෙයින් එම පෙත්සම සලකා බැලීම සඳහා වෙනත් දිනයක් ලබා දෙන ලෙස ඔහුගේ කනිෂ්ඨ නීතිඥවරයා අධිකරණයෙන් ඉල්ලා සිටියේය.
මෙහිදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් නෙරීන් පුල්ලේ මහතා අධිකරණයට දන්වා සිටියේ, කොවිඩ් මරණය ආදාහනය පිළිබඳව ශ්‍රේෂ්ඨාධිකරණය මගින් දැනටමත් තීරණයක් ලබා දී ඇති බැවින් එම පෙත්සමට අදාළ සීමිත විරෝධතා ගොනුකිරීම සඳහා කල් ලබාදෙන ලෙස ඉල්ලීමක් කළේය.
ඒ අනුව පෙත්සමට අදාළ විරෝධතා ගොනුකිරීම සඳහා වගඋත්තරකරුවන්ට අද දින සිට සති හයක් කල් ලබාදුන් ශ්‍රේෂ්ඨාධිකරණය එම පෙත්සම සලකා බැලීම සඳහා මාර්තු මස 29 වන දා කැඳවන බව නියෝග කළේය.
