පසුගියදා ලෝකයම කම්පා කරමින් ඉන්දියාවේ ගුජරාට් ප්රාන්තයේ අහමදාබාද් නගරයේ සර්දාර් වල්ලභභායි පටෙල් ජාත්යන්තර ගුවන් තොටුපොළෙන් ගුවන්ගත වී ටික වේලාවකින් මේඝානි නගර් ප්රදේශයේ පිහිටි බීජේ වෛද්ය විද්යාලයේ ශිෂ්ය නේවාසිකාගාරය මතට කඩා වැටීමෙන් ජීවිතක්ෂයට පත් වූ පුද්ගලයින් 215 දෙනෙකුගේ DNA ගැලපීම් තහවුරු කරගෙන ඇති බව ඉන්දීය මාධ්ය වාර්තා කරනවා.
NDTV පුවත් සේවය පැවසුවේ එලෙස හඳුනාගැනුණු මළසිරුරු 198ක් මේ වනවිට (20) අදාළ පවුල්වල ඥාතීන් වෙත භාර දී ඇති බවයි.
ජුනි මස 12 වැනි දින සිදු වූ ගුවන් අනතුරින් කඩා වැටුණේ එයාර් ඉන්දියා ගුවන් සේවයේ බෝයිං 787-8 ඩ්රීම්ලයිනර් යානයක්.
අහමදාබාද් සිවිල් රෝහල් අධිකාරී රාකේෂ් ජෝෂි පැවසුවේ මියගිය 198 දෙනාගෙන් 149 දෙනෙකුම ඉන්දීය ජාතිකයින් බවත් පෘතුගීසි ජාතිකයින් සත්දෙනෙකු, බ්රිතාන්ය ජාතිකයින් 32ක් සහ එක් කැනේඩියානු ජාතිකයෙක් සිටින බවයි.
මියගිය 15 දෙනෙකුගේ මළ සිරුරු ගුවන් මගින් සහ 183 දෙනෙකුගේ සිරුරු මහා මාර්ග ඔස්සේ ගිලන්රථ හරහා යවා ඇති බව ද හෙතෙම වැඩිදුරටත් පැවසුවා.
අහමදාබාද් පොලිස් කොමසාරිස් ජීඑස් මලික් මහතා පැවසුවේ AI-171 ගුවන් අනතුරින් මියගිය 222 දෙනෙකු මේ වන විට හඳුනාගෙන ඇති අතර, ඉන් 214 දෙනෙකු DNA සාම්පල මත පදනම්ව සහ 8 දෙනෙකු DNA ගැලපීමකින් තොරව හඳුනාගෙන ඇති බවයි.
මලික් මහතා වැඩිදුරටත් මෙසේ සඳහන් කළා.
“පොලිසිය ද විමර්ශනයේ ඔවුන්ගේ කොටස ඉටු කරයි, නමුත් අනෙකුත් ආයතන සහ විශේෂඥයින් කළු පෙට්ටිය විශ්ලේෂණය කිරීම වැනි තාක්ෂණික කොටස ඉටු කරයි, විමර්ශනය සිදුවෙමින් පවතී… මේ වන විට පුද්ගලයින් 222 ක් හඳුනාගෙන ඇති අතර, DNA සාම්පල මත පදනම්ව 214 ක් සහ DNA නොමැතිව අට දෙනෙකු හඳුනාගෙන ඇති අතර ඔවුන්ගේ සිරුරු ඔවුන්ගේ පවුල්වලට භාර දී ඇත,” යනුවෙන්.
