2023 වර්ෂයේ ඉදිරි යල සහ මහ කන්න අස්වනු සරු කර ගැනීම සඳහා ජය ශ්රී මහා බෝ සමිදුන් අභියස පවත්වන සාම්ප්රදායනුකූල අලුත් සහල් මංගල්යය අද ජනාධිපති රනිල් වික්රමසිංහගේ ප්රධානත්වයෙන් පැවැත්වෙනවා.
කෘෂිකර්ම අමාත්යාංශය, ගොවිජන සංවර්ධන දෙපාර්තමේන්තුව හා අනුරාධපුර දිස්ත්රික් ලේකම් කාර්යාලය ඇතුළු ආයතන රැසක දායකත්වයෙන් පැවැත්වෙන අලුත් සහල් මංගල්යයේ සාම්ප්රධායික වතාවත් ඊයේ උදෑසන ජය ශ්රී මහා බෝ සමිඳුන් අභියස දී ආරම්භ කෙරුණා.
ඒ අනුව කෘෂිකර්ම අමාත්ය මහින්ද අමරවීරගේ ප්රධානත්වයෙන් ජය ශ්රී මහා බෝධීන්වහන්සේ ගේ සතර වාහල්කඩ දී සමාරම්භක කිරි ආහාර පූජාව ඊයේ පෙරවරුවේ සිදු වුණා.
2022,23 මහ කන්නයේ සෑම දිස්ත්රික්කයකම ගොවි ජනතාව විසින් සිය අස්වැන්නේ පළමු කොටස ජය ශ්රී මහා බෝ සමිඳුන්ට පූජා කිරීම උදෙසා අලුත් සහල් මංගල්යය පවත්වනු ලබනවා.
56 වන වරටත් පවත්වන ජාතික අලුත් සහල් මංගල්යය වෙනුවෙන් ඊයේ උදෑසන සතර වාහල්කඩයන්හි කිරි ඉතිරීම සිදු කළ අතර දවස පුරා ශ්රී මහා බෝධීන් වහන්සේ අබියස ශබ්ද පූජා පැවැත්වීම ද සිදු කරනු ලැබුවා.
අද උදෑසන කිරි ආහාර පූජාවෙන් පසු උදෑසන 7.30ට සිංහ කණුව රථ ගාල අබියසින් සහල් පාත්ර රැගත් පෙරහර ආරම්භ කිරීමට නියමිතයි. ඉන් අනතුරුව උදෑසන 8.30ට ජනාධිපතිතුවරයාගේ ප්රධානත්වයෙනුයි මහා පාත්රයට සහල් පිරවීම සිදු කරනු ලබන්නේ.
අලුත් සහල් මංගල්යය සඳහා දිස්ත්රික් 25න්ම සහල් රැගෙන එන අතර, සහල් එක්රැස් කිරීම සිදු කෙරුණේ ගොවිජන සංවර්ධන දෙපාර්තමේන්තුවේ මැදිහත් වීමෙන්.
