අයි.පී.එල්. පිටියේ පෙරළිකාරයා මතීෂ ගැන හර්ෂා බෝග්ලිගෙන් අමුතුම කතාවක්

අයි.පී.එල්. තරගවලියේ තවත් තරගයෙක් ඊයේ (21) රාත්‍රියේ පැවැත් වුණේ සන්රයිසස් හයිද්‍රාබාද් සහ චෙන්නායි සුපර් කිංග්ස් කණ්ඩායම් අතරයි.

චෙන්නායි හි චිදම්බරම් ක්‍රීඩාංගණයේ දී පැවති මෙම තරගය හයිද්‍රාබාද් කණ්ඩායම පරාජය කරමින් චෙන්නායි පිළ ජයගත්තේ කඩුලු 07කින්.

තරගයේ කාසිය වාසිය දිනූ චෙන්නායි නායක මහේන්ද්‍ර සිං දෝනිගේ ආරාධනයෙන් පළමුව පන්දුවාර පහරදුන් හයිද්‍රාබාද් ක්‍රීඩකයින් නියමිත පන්දුවාර 20 තුළ කඩුලු 07ක් දැවී ලකුණු 134ක් රැස් කළා.

එහිදී ආරම්භක පිතිකරු අභිෂේක් ෂර්මා ලකුණු 34ක් සහ රාහුල් ත්‍රිපාටි ලකුණු 21ක් රැස්කළ අතර, අනෙකුත් ක්‍රීඩකයින්ට එතරම් ලකුණු අතරට පැමිණීමට චෙන්නායි පන්දු යවන්නන් ඉඩ ලබාදුන්නේ නැහැ.

හයිද්‍රාබාද් ක්‍රීඩකයින් ලකුණු 134 සීමාවේ රඳවා ගැනීමට දඟ පන්දුවෙන් දස්කම් දැක්වූ රවීන්ද්‍ර ජඩේජා සහ මහීෂ් තීක්ෂණට හැකියාව ලැබුණු අතර, එහිදී ජඩේජා ලකුණු 22ක් තුළ කඩුලු 03ක් සහ තීක්ෂණ සිය පන්දුවාර 04 තුළ ලකුණු 27ක් ලබා දෙමින් එක් කඩුල්ලක් දවාගත්තා.

යළිත් වරක් අවසන් පන්දුවාර කිහිපයේ දී මතීෂ පතිරණ කෙරෙහි විශ්වසය තැබූ නායක මහේන්ද්‍ර සිං දෝනි හයිද්‍රාබාද් ඉනිමේ 18 වන සහ 20 වන පන්දුවාර යැවීමේ වගකීම ඔහුට පැවරුවා.

එහිදී විශිෂ්ඨ පන්දු යැවීමක නිරත වූ මතීෂ පතිරණ සිය පන්දුවාර 04 තුළ ලකුණු 22ක් පමණක් ලබාදෙමින් ප්‍රතිවාදී හයිද්‍රාබාද් ඉනිමේ හෙන්රිච් ක්ලාසන්ගේ කඩුල්ල දවා ගත්තා.

ඉන් අනතුරුව ලකුණු 135ක ජයග්‍රාහී ඉලක්කයක් හඹා යාමට චෙන්නයි ආරම්භක පිතිකරු යුගළය පිටියට පිවිසි අතර, මේ වනවිටත් සිය පිත්තේ රිදම මැනවින් හඳුනාගෙන සිටින ආරම්භක පිතිකරු ඩෙවොන් කොන්වේ අගනා ඉනිමක් ක්‍රීඩා කළා.

චෙන්නායි පිළ ආරම්භයේ සිටම ජයග්‍රහණය කරා රැගෙන ගිය ඩෙවොන් කොන්වේ නොදැවී ලකුණු 77ක් රැස්කළ අතර අනෙක් ආරම්භක පිතිකරුවා වූ රුතුරාජ් ගයික්වාඩ් ලකුණු 35ක් රැස්කිරීමට සමත් වුණා.

ඒ, අනුව චෙන්නායි පිළ පන්දුවාර 18යි පන්දු 04ක් තුළ කඩුලු 03ක් පමණක් දැවී අදාළ ඉලක්කය පසුකර යමින් තරගයේ ජයග්‍රහණය හිමිකර ගත්තා.

මේ අතර මෙම තරගයෙන් අනතුරුව චෙන්නායි පිළ නියෝජනය කරන ශ්‍රී ලංකා යොවුන් වේග පන්දු යවන ක්‍රීඩක මතීෂ පතිරණ පිළිබඳව ඉන්දීය ප්‍රවීන ක්‍රිකට් විස්තර විචාරකයෙකු වන හර්ෂා බෝග්ලි විසින් සිය නිල ට්විටර් ගිණුමට විශේෂ සටහනක් එක්කර තිබුණා.

“ශ්‍රී ලාංකේය රසික රසිකාවියනි, ඔබට මතීෂ පතිරණ නම් මැණික ලැබෙන්නට ඉඩ ඇත. දෝනි ඔබ වෙනුවෙන් ඔහුව සූදානම් කරනවා” යනුවෙන් හර්ෂා බෝග්ලි සිය නිල ට්විටර් ගිණුමේ සටහන් කර ඇති අයුරු දැකගත හැකි වුණා.