මහරගම අපේක්ෂා රෝහලේ ඇතැම් පිළිකා ඖෂධ වර්ගවල හිඟයක් පවතින බව රජයේ වෛද්‍ය නිලධාරීන්ගේ සංගමය පවසනවා.
එම සංගමයේ මාධ්‍ය කමිටු සාමාජික වෛද්‍ය හන්සමාල් වීරසූරිය අද පැවති මාධ්‍ය හමුවකට එක්වෙමින් කියාසිටියේ අනෙක් ඖෂධ වර්ගවලට වඩා පිළිකා ඖෂධ පිළිබඳ විශේෂ සැලකිල්ලක් දැක්විය යුතු වන බවයි.
එමෙන්ම අනෙක් රෝහල්වල ද සාමාන්‍ය ඖෂධ වර්ගවල ද හිඟතාවක් පවතින බවට තොරතුරු වාර්තාවී ඇති බවයි ඔහු පෙන්වා දෙන්නේ.
මහරගම පිළිකා රෝහලේ රෝගීන්ට ලබාදිය යුතු අත්‍යවශ්‍ය ප්‍රධාන ඖෂධ වර්ගවල සැලකිය යුතු ප්‍රමාණයක් ද හිඟ වන අතර පියයුරු පිළිකා ඖෂධ මෙන්ම ආන්ත්‍රික පිළිකා වෙනුවෙන් ලබාදෙන ඖෂධ ද හිඟයක් පවතින බව රජයේ වෛද්‍ය නිලධාරීන්ගේ මාධ්‍ය කමිටු සාමාජිකයා සඳහන් කළා.
රෝගීන් රැසකට ඖෂධ පෞද්ගලිකව මිලදී ගැනීමට සිදුව ඇති තත්වයක් මත රුපියල් ලක්ෂයකට වඩා වියදම් වන ඖෂධ වර්ග ද පවතින අතර ඇතැම් රෝගීන්ට කණකර බඩු උකස් කර ප්‍රතිකාර ලබාගැනීමට සිදුව ඇති බවයි හන්සමාල් වීරසුරිය මහතා කියාසිටියේ.
