නිමා වූ පාර්ලිමේන්තු මැතිවරණය සඳහා තරග කළ අපේක්ෂකයින් 1,024 දෙනෙක් සිය ආදායම් වියදම් වාර්තා භාර දී නොමැති බව මැතිවරණ කොමසාරිස් ජෙනරාල් සමන් ශ්‍රී රත්නායක පවසනවා.
ඒ, අනුව මැතිවරණයට ඉදිරිපත් වූ අපේක්ෂකයින් 8,888න් 7,864 දෙනෙක් සිය ආදායම් වියදම් වාර්තා භාර දී ඇති බවයි කොමසාරිස්වරයා සඳහන් කළේ.
එලෙස භාර දී ඇති අදායම් වියදම් වාර්තා අද (17) දිනයේ සිට දිස්ත්‍රික් ලේකම් කාර්යාලවල මහජනතාව සඳහා ප්‍රදර්ශනය කරන බව මැතිවරණ කොමසාරිස්වරයා මාධ්‍ය හමුවක් පවත්වමින් සඳහන් කළා.
මේ අතර ආදායම් වියදම් වාර්තා භාර නොදුන් අපේක්ෂකයින් 1,024 සම්බන්ධයෙන් ඒ ඒ දිස්ත්‍රික් තේරීම් භාර නිලධාරීන් විසින් අදාළ දිස්ත්‍රික්කයේ නියෝජ්‍ය පොලිස්පතිවරුන්ට පැමිණිලි කිරීමට නියමිත බවයි වාර්තා වුණේ.
ඒ, අනුව එම අපේක්ෂකයින්ට අදාළ නීතිමය කටයුතු ගැනීමට මූලික කටයුතු ඉදිරි දින කිහිපය තුළ සිදුකරන බව ද මැතිවරණ කොමසාරිස් ජෙනරාල්වරයා මෙහිදී පැවසුවා.
