බාලවයස්කාර දරුවකුට බරපතල ලිංගික අපචාරයක් සිදු කිරීම සහ බාලවයස්කාර සාමනේර හිමි නමකට පහර දී තුවාල සිදු කිරීමේ චෝදනාවට අදාළව වෙන් වෙන් වශයෙන් පවරා තිබූ නඩු දෙකකට වරද පිළිගත් හිමි නමකට කොළඹ මහාධිකරණය විසින් අද අත්හිටවූ සිරදඬුවම් සහ රුපියල් ලක්ෂ 6ක වන්දියක් මෙන්ම දඩ මුදල් ගෙවන ලෙස නියෝග කළා.
බාල වයස්කාර දරුවෙකුට බරපතල ලිංගික අපචාරයක් සිදු කිරීම සම්බන්ධයෙන් අදාළ හිමිනමට එරෙහිව ගොනුකර තිබූ එක් නඩුවක් අද කොළඹ මහාධිකරණ විනිසුරු මංජුල තිලකරත්න මහතා ඉදිරියේ කැඳවනු ලැබුවා.
එහිදී විත්තිකරු වෙනුවෙන් පෙනී සිටි නීතිඥ නාමල් රාජපක්ෂ මහතා අධිකරණයට කරුණු දක්වමින් කියාසිටියේ විත්තිකරු තමන්ට එල්ල වී තිබෙන චෝදනා තුනටම වරද පිළිගන්නා බවයි.
ඒ අනුව අදාළ චෝදනා තුනටම විත්තිකරු වරදකරු කළ කොළඹ මහාධිකරණ විනිසුරු මංජුල තිලකරත්න මහතා ඔහුට මාස 18ක බරපතල වැඩ සහිත සිර දඬුවමක් නියම කර එය වසර පහකට අත්හිටුවීමට ද නියෝග කළා.
ඊට අමතරව රුපියල් ලක්ෂ පහක වන්දියක් ද නියම කළ මහාධිකරණ විනිසුරුවරයා එම වන්දි මුදල අගතියට පත් පාර්ශවයට ගෙවන ලෙසත් නියෝග කර තිබෙනවා.
එමෙන්ම විනිසුරුවරයා විසින් විත්තිකරුට රුපියල් 3000ක දඩයක් ද නියම කරනු ලැබුවා.
ඉන් අනතුරුව 2016 වසරේ සිය විහාරස්ථානයේ වැඩ වාසය කළ සාමනේර හිමි නමකට පහර දී තුවාල සිදු කිරීමේ සිද්ධියට අදාළව විත්තිකාර හිමිනමට එරෙහිව ගොනු කර තිබූ තවත් නඩුවක් කොළඹ මහාධිකරණ විනිසුරු දමිත් තොටවත්ත මහතා ඉදිරියේ කැඳවනු ලැබුවා.
එම චෝදනාවලට ද විත්තිකාර හිමි නම වරද පිළිගත් අතර ඒ අනුව වසර දෙකක බරපතළ වැඩ සහිත සිර දඬුවම් නියම කර එම දඬුවම වසර පහකට අත්හිටුවන ලෙස විනිසුරුවරයා විසින් නියෝග කළා.
ඊට අමතරව පහර කෑමට ලක්වූ බාල වයස්කරුට රුපියල් ලක්ෂයක වන්දියක් ගෙවන ලෙසටයි විත්තිකරුට නියෝග කෙරුණේ.
මීට අමතරව රුපියල් දෙදහසක දඩයක් ගෙවන ලෙසත් විනිසුරුවරයා විසින් හිමි නමකට නියෝග කර තිබෙනවා.
