අනතුරට පත් කාන්තාවගේ කකුළේ කොටසත් රැගෙන සිසුවා ගෙදර ගිහින්

අක්මීමන – හිනිඳුම්ගොඩ කනිෂ්ඨ විද්‍යාලය අසළ ඊයේ (24) සිදුවූ අනතුරකින් කාන්තාවකගේ පාදයක කොටසක් අහිමිව ගොස් තිබෙනවා.

වයස අවුරුදු 16ක පාසල් සිසුවෙක් පැදවූ යතුරුපැදියක ගැටීමෙන් අදාළ කාන්තාව අනතුරට ලක්ව ඇති බවයි පොලිසිය සඳහන් කළේ.

මාර්ගයේ ගමන් කරමින් සිටි කාන්තාවක් මෙලෙස අනතුරට ලක්ව ඇති අතර, අනතුරින් කාන්තාවගේ එක් පාදයක් වළලුකරට ඉහළින් වෙන් වී තිබෙනවා.

එලෙස වෙන් වූ පාදයේ කොටස යතුරුපැදියේ ඇමිනී ඇති අතර, ඒ බව නොදැන යතුරුපැදිය ද රැගෙන අදාළ සිසුවා එම ස්ථානයෙන් පළාගොස් ඇති බවයි වාර්තා වන්නේ.

යතුරුපැදිය ද සමඟ පළා ගිය පාසල් සිසුවා නිවසට පැමිණි පසු යතුරුපැදියේ ඇමිනී තිබූ පාදයේ කොටස දැකඇති අතර, පසුව ඔහු එය රෙදි කැබැල්ලක ඔතා කැලයකට විසිකර යතුරුපැදිය සෝදා පිරිසිදු කර ඇති බවයි පොලිසිය සඳහන් කළේ.

අනතුර සම්බන්ධයෙන් විමර්ශන ඇරඹු අක්මීමන පොලිසිය සැකකාර පාසල් සිසුවා නිවස තුළ සැඟව සිටිය දී අත්අඩංගුවට ගැනීමටයි කටයුතු කර ඇත්තේ.

එහිදී සිසුවා විසිකර දමා තිබූ පාද කොටස ද පොලිසිය විසින් සොයාගෙන තිබෙනවා.

මේ අතර තුවාල ලැබූ කාන්තාව කරාපිටිය රෝහලට ඇතුළත් කර ඇති අතර, වෙන්වූ කොටස පැය කිහිපයකට පසුවයි රෝහල වෙත ලැබී ඇත්තේ.

කෙසේ වෙතත් එම කොටස යළි පාදයට සම්බන්ධ කිරීමට හැකියාවක් නොලැබී ඇති අතර, කාන්තාව මේ වනවිට එම රෝහලේ නේවාසිකව ප්‍රතිකාර ලබනවා.

මේ අතර අත්අඩංගුවට ගැනුණු සිසුවා අද (25) දින අධිකරණයට ඉදිරිපත් කිරීමට නියමිතව බව අක්මීමන පොලිසිය සඳහන් කළා.