හයිලෙවල් මාර්ගයේ මීගොඩ 20 කණුව ප්‍රදේශයේදී සිදු වූ රිය අනතුරකින් 11 හැවිරිදි පිරිමි ළමයෙකු ජීවිතක්ෂයට පත්වී තිබෙනවා.
ඊයේ රාත්‍රී මෙම අනතුර සිදුවී ඇත්තේ රිය අනතුරක් සිදු කර පළා යමින් තිබූ මෝටර් රථයක් හේතුවෙන් බවයි පොලිසිය සඳහන් කළේ.
අවිස්සාවේල්ල සිට හෝමාගම දෙසට ධාවනය වූ මෝටර් රථයක් 20 කණුව අසලදී මාර්ගයේ ගමන් කරමින් සිටි කාන්තාවක් සහ පිරිමි පුද්ගලයෙකු අනතුරට ලක් කර පළාගොස් තිබෙනවා.
පළා යමින් තිබූ අදාළ මෝටර් රථය ඉදිරියෙන් පැමිණි කැබ් රථයක ගැටී ඇති අතර එම කැබ් රථය මාර්ගය අසල නතර කර තිබූ ත්‍රී රෝද රථයක ගැටී තිබෙනවා.
එම අනතුරින් අදාළ ත්‍රී රෝද රථයේ රියදුරා සහ එහි ගමන් ගත් ඔහුගේ දරුවා තුවාල ලැබූ අතර ඔවුන් රෝහලට ඇතුලත් කිරීමේදීයි පිරිමි ළමයා මියගොස් ඇත්තේ.
ත්‍රී රෝද රථයේ ගමන් කළ එම පියා සහ පුත්‍රයා හෙට්ටියාවත්ත ප්‍රදේශයේ පදිංචිකරුවන්.
අනතුර සම්බන්ධයෙන් මෝටර් රථයේ රියදුරා අත්අඩංගුවට ගෙන ඇති අතර මීගොඩ පොලිසිය වැඩිදුර පරීක්ෂණ සිදු කරනවා.
