අගමැති මෝදිට ආරාධනයක් ද රැගෙන ඉන්දීය විදේශ ඇමති දිවයිනෙන් පිටව යයි

ශ්‍රී ලංකාවේ එක් දින නිල සංචාරයක් සඳහා පැමිණි ඉන්දීය විදේශ කටයුතු අමාත්‍ය ආචාර්ය සුබ්‍රමනියම් ජයශංකර් එම සංචාරය අවසන් කරමින් අද (04) පස්වරුවේ දිවයිනෙන් පිටව ගියා.

ඔහු පැමිණි අයි.එෆ්.සී- 34 දරණ ඉන්දීය ගුවන් හමුදාවට අයත් විශේෂ ගුවන් යානයෙන් අද (04) පස්වරු 06.15ට ඉන්දියාවේ නවදිල්ලි නුවර බලා පිටත්ව ගිය බවයි ගුවන් තොටුපොළ දසත නිවුස් වාර්තාකරු පැවසුවේ.

ඔවුන්ට සමුදීම සදහා ශ්‍රී ලංකාවේ විදේශ කටයුතු අමාත්‍යාංශයේ නිලධාරීන් පිරිසක් සහ ශ්‍රී ලංකාවේ ඉන්දීය මහකොමසාරිස් කාර්යාලයේ නිලධාරීන් පිරිසක් ද කටුනායක ගුවන් තොටුපොළ වෙත පැමිණ සිටි බවයි අප වාර්තාකරු වැඩිදුරටත් සඳහන් කළේ.

අද (04) පෙරවරුවේ දිවයිනට පැමිණි ඉන්දීය විදේශ කටයුතු අමාත්‍යවරයා ජනාධිපති අනුර කුමාර දිසානායක,අග්‍රාමාත්‍ය හරිනි අමරසූරිය, විපක්ෂ නායක සජිත් ප්‍රේමදාස, ශ්‍රී ලංකාවේ විදෙස් ඇමති විජිත හේරත් සහ හිටපු ජනාධිපති රනිල් වික්‍රමසිංහ හමු වී විශේෂ සාකච්ඡාවල නිරත වුණා.

මේ අතර ජනාධිපති අනුර කුමාර දිසානායකට ඉන්දියාවේ සංචාරයක් සඳහා පැමිණෙන ලෙස ඉන්දීය අග්‍රාමාත්‍ය නරේන්ද්‍ර මෝදි ආරාධනා කර තිබෙනවා.

අග්‍රාමාත්‍ය නරේන්ද්‍ර මෝදි වෙනුවෙන් එම ආරාධනය ඉන්දීය විදේශ කටයුතු අමාත්‍ය ආචාර්ය සුබ්‍රමනියම් ජයශංකර් විසින් සිදුකර ඇති බවයි වාර්තා වුණේ.

ජනාධිපති අනුර කුමාර දිසානායක සහ ඉන්දීය විදේශ කටයුතු අමාත්‍යවරයා අතර සාකච්ඡාව අද (04) පස්වරුවේ පැවැත් වුණේ ජනාධිපති කර්යාලයේ දීයි.

එහිදී ඉන්දු – ශ්‍රී ලංකා සහයෝගිතාව විවිධ ක්ෂේත්‍ර ඔස්සේ තවදුරටත් ශක්තිමත් කර ගැනීම පිළිබඳව ද ජනාධිපතිවරයා සමඟ සාකච්ඡා කර තිබෙනවා.

ශ්‍රී ලංකාවේ සංචාරක ක්ෂේත්‍රයේ මෙන්ම ආයෝජනය, විදුලිබල හා බලශක්ති සහ දියර කිරි කර්මාන්තය යන ක්ෂේත්‍ර සඳහා සහායවීමට ඉන්දියාව දක්වන උනන්දුව පිළිබඳව ද කරුණු පැහැදිළි කළ ඉන්දීය විදේශ කටයුතු අමාත්‍යවරයා ශ්‍රී ලංකාවේ ආර්ථික පුනරුදය සඳහා ඉන්දියාවේ පූර්ණ සහයෝගය ලබා දෙන බවට සහතික වී ඇති බව සඳහන්.

එමෙන්ම ශ්‍රී ලංකාවට සිය ආර්ථික පුනරුදය ඉහළ නංවා ගැනීම වෙනුවෙන් ඉන්දියාවේ දැවැන්ත වෙළඳපොළ ප්‍රයෝජනයට ගැනීමේ හැකියාව ද අමාත්‍යවරයා අවධාරණය කළා.

මෑත කාලීනව ශ්‍රී ලංකාවට මුහුණ දිමට සිදුවූ ආර්ථික අර්බුදයේ දී ඉන්දියාව ලබා දුන් මූල්‍ය සහායට සිය කෘතඥතාව පළ කළ ජනාධිපති අනුර කුමාර දිසානායක ඉන්දියාව සමඟ අඛණ්ඩ සහයෝගීතාවයෙන් කටයුතු කිරීම තම අරමුණ බවද සඳහන් කළා.

ධීවර කර්මාන්තය සහ ජාතික සමගිය ප්‍රවර්ධනය කිරීම ඇතුළු අන්‍යෝන්‍ය වශයෙන් උනන්දුවක් දක්වන ක්ෂේත්‍ර පිළිබඳව ද මෙම හමුවේ දී අවධානය යොමු කෙරුණා.

එමෙන්ම ඉන්දීය අග්‍රාමාත්‍ය නරේන්ද්‍ර මෝදිට ද නුදුරු පහසු දිනකදී ශ්‍රී ලංකාවේ සංචාරයකට එක්වන ලෙස ජනාධිපති අනුර කුමාර දිසානායක මෙහිදී ආරාධනා කර තිබෙනවා.