මරණයක් සිදු වූ අවස්ථාවක සිදුකරනු ලබන ස්ථානීය පරීක්ෂණය සම්බන්ධයෙන් හදිසි මරණ පරීක්ෂකවරුන්ගේ දැනුම පුළුල් කිරීම අරමුණු කර ගනිමින් ධාරිතා සංවර්ධන වැඩසටහනක් අනිද්දා (28) පැවැත්වෙනවා.
සමස්ත ලංකා හදිසි මරණ පරීක්ෂකවරුන්ගේ සංගමයේ අනුග්‍රහය යටතේ රජයේ රස පරීක්ෂක දෙපාර්තමේන්තුව විසින් මෙම පුහුණු වැඩමුළුව පවත්වනු ලබනවා.
වෙඩි තබාගැනීම හා වෙඩි වැදීම, වස විෂ ශරීරගත වීම සහ ශරීරගත කිරීම, පිපිරවීම් හා පුපුරවා ගැනීම් හා සාමාන්‍ය මරණ සම්බන්ධ ස්ථාන පරීක්ෂා කිරීම පිළිබඳ පුළුල් අවබෝධයක් මරණ පරීක්ෂකවරුන්ට ලබාදීම මෙම වැඩමුළුවේ අරමුණ බවයි සමස්ත ලංකා හදිසි මරණ පරීක්ෂකවරුන් ගේ සංගමයේ සභාපති අනුර හේරත් සඳහන් කළේ.
සැක සහිත නොවන ස්වභාවික මරණයක් සිදුවූ අවස්ථාවක ග්‍රාමනිලධාරිවරයාට මළ සිරුර නිදහස් කිරීමට හැකියාව තිබෙන නමුත්, මරණය සම්බන්ධයෙන් පරීක්ෂණයක් සිදුකරන්නේ නම් පොලීසිය එය යොමු කරනු ලබන්නේ හදිසි මරණ
පරීක්ෂකවරයාට හෝ මහේස්ත්‍රාත්වරයාට යැයි සභාපතිවරයා සඳහන් කර සිටියා.
මරණය කිසියම් අපරාධයක ප්‍රතිපලයක් නිසා වූවක් බවට හැඟී ගියහොත් පොලීසිය පරීක්ෂණ මහේස්ත්‍රාත්වරයාට යොමු කරන බවත් එවැනි තත්ත්වයක් දක්නට නොලැබෙන අවස්ථාවක පොලීසිය එය හදිසි මරණ පරීක්ෂක වෙත යොමු කරන බවත් කී සභාපතිවරයා මරණ පරීක්ෂකවරුන්ට මරණයක් හා සම්බන්ධ ස්ථානීය පරීක්ෂණයක් සිදුකරන්නේ කෙසේ ද යන්න පිළිබඳව පුළුල් අවබෝධයක් පැවැතීම රාජකාරි කටයුතු හොඳින් සිදුකිරීමට අත්‍යවශ්‍යය යැයි ද අවධාරණය කළා.
