සිසුවියකට හා සිසුන් 5කට බරපතළ ලිංගික අතරවර කිරීම සම්බන්ධයෙන් පුද්ගලයෙක් අත්අඩංගුවට (වීඩියෝ)

පහළොස් හැවිරිදි පාසල් සිසුවියක් හා පාසල් සිසුන් පස් දෙනෙකුට බරපතළ ලිංගික අපයෝජනයකට ලක්කළ බව කියන සිද්ධියක් සම්බන්ධයෙන් පේරාදෙණිය ඉහළ මුරුතලාව ප්‍රදේශයේ 63 හැවිරිදි පුද්ගලයෙකු මහනුවර කොට්ඨාස ළමා හා කාන්තා කාර්යාංශය මගින් සැකපිට අත්අඩංගුවට ගෙන තිබෙනවා.

සැකකරු ප්‍රදේශවාසීන් ද බිය කරමින් දරුවන් බලහත්කාරයෙන් අපයෝජනය කළ අවස්ථාවද වාර්තා වී තිබෙන බවයි පොලීසිය පවසන්නේ.

මෙම පුද්ගලයාට එරෙහිව 15 හැවිරිදි දැරිය මෙයට ප්‍රථම පේරාදෙණිය පොලීසියට පැමිණිල්ලක් සිදුකර තිබෙන නමුත් ඒ සම්බන්ධයෙන් පොලීසිය නීතිමය පියවරක් නොගෙන සැකකාර පුද්ගලයාට අවවාද කොට යවා ඇති බවයි වාර්තා වන්නේ.

අපයෝජනයට ලක්වූ බව කියන පාසල් සිසුන් පස් දෙනා අවුරුදු 12-15 වයසේ පසුවන බවත් ඔවුන් අතර එකම පවුලේ සහෝදරයින් දෙදෙනෙකුද සිටින බවත් ළමා හා කාන්තා කාර්යාංශය පවසනවා.

පාසල් සිසුවිය හා සිසුන් පස් දෙනා සැකකරු විසින් අවස්ථා ගණනාවකදී අපයෝජනයට ලක්කර තිබෙන බව පොලිස් පරීක්ෂණ මගින් අනාවරණය වී තිබුණා.

විවාහක දෙදරු පියෙක් වන මොහු තවත් පිරිමි දරුවෙකු ප්‍රදේශයේ ලදු කැලයකට ඇදගෙන ගොස් අතවර කිරීමට සූදානම් වූ අවස්ථාවේ එම ළමයා සැකකරුගේ අත සපා ඔහුගෙන් බේරී පැන ආ බවද දරුවෙකුට අතවර කිරීම සම්බන්ධයෙන් විමසීමට ආ දරුවාගේ පියෙකුටද ඔහු පහර දුන් බවද සඳහන්.

සිද්ධිය සම්බන්ධයෙන් පොලීසියට පැමිණිලි ලැබීමෙන් පසු සැකකරු ප්‍රදේශයෙන් පළාගොස් සැඟව සිටියදී කොට්ඨාස ළමා හා කාන්තා කාර්යාංශයේ ස්ථානාධිපති ප්‍රධාන පොලිස් පරීක්ෂක දේවින්දි වික්‍රමසිංහ උපදෙස් මත පොලිස් කණ්ඩායමක් සිවිල් ඇදුමින් රැක්වල්ලා සිට කිරිබත්කුඹුර ප්‍රදේශයේ දී සැකකරු අත්අඩංගුවට ගෙන තිබෙනවා.

අපයෝජනයට ලක් වූ බව කියන සිසුවිය හා සිසුන් පස් දෙනා මහනුවර ජාතික රෝහලේ අධිකරණ වෛද්‍යවරයා වෙත යොමුකර වාර්තාවක් ලබා ගැනීමට පොලීසිය පියවර ගෙන තිබුණා.

සැකකරු මහනුවර අතිරේක මහේස්ත්‍රාත් වාසනා නවරත්න හමුවට අද (02) ඉදිරිපත් කිරීමෙන් පසු මෙම මස 11 දින දක්වා රක්ෂිත බන්ධනාගාර ගතකර ඇති බවයි වාර්තා වන්නේ.

මෙම පුද්ගලයා විසින් අතවරයට ලක් කරන ලද තවත් දරු දැරියන් ප්‍රදේශයේ සිටිය හැකි බවට සැක කරන පොලිසිය ඒ සම්බන්ධයෙන්ද පරීක්ෂණ ආරම්භ කර තිබෙනවා.