ශ්‍රී ලංකා නාවික හමුදාව අද (12) දින සිදු කළ විශේෂ මෙහෙයුමකින් මෙරට මුහුදු තීරයේ නීතිවිරෝධීව ධීවර කටයුතු කළ ඉන්දීය ධීවරයින් 12 දෙනෙකු සිය භාරයට ගැනීමට කටයුතු කර තිබෙනවා.
නාවික හමුදා මාධ්‍ය අංශය නිවේදනය කළේ මෙම වැටලීම සිදු කර ඇත්තේ; යාපනය, චූණ්ඩිකුලම් ප්‍රදේශයට ඔබ්බෙන් වූ මුහුදු ප්‍රදේශයේ දී බවයි.
මෙම මෙහෙයුමෙන් ඉන්දීය ධීවර යාත්‍රාවක් සමඟ ඉන්දීය ධීවරයින් 12 දෙනෙකු අත් අඩංගුවට ගෙන ගොඩබිමට රැගෙන විත් තිබෙනවා.
අද අලුයම් කාලයේ මෙරට මුහුදු සීමාවට ඇතුළු වී අනවසර ධීවර කටයුතු සිදුකළ ඉන්දීය ධීවර යාත්‍රා රැසක් උතුරු නාවික විධානය මගින් නිරීක්‍ෂණය කරමිනුයි මොවුන්ව අත්අඩංගුවට ගෙන ඇත්තේ.
ඉන්දීය ධීවරයින් 12 දෙනා කන්කසන්තුරය වරාය වෙත රැගෙන විත්, ඉදිරි නීතිමය කටයුතු සඳහා යාපනය, මයිලඩි ධීවර පරීක්‍ෂක කාර්යාලය වෙත භාරදීමට නියමිතව ඇති බව ද වාර්තා වනවා.
මෙම මෙහෙයුමත් සමග 2024 වර්ෂයේ මේ දක්වා සිදුකළ මෙහෙයුම් මගින් මෙරට මුහුදු සීමාව තුළ අනවසර ධීවර කටයුතු සිදුකළ ඉන්දීය ධීවර යාත්‍රා 66ක් සහ ඉන්දීය ධීවරයින් 497 දෙනෙකු නාවික හමුදා භාරයට ගෙන ඉදිරි නීතිමය කටයුතු සඳහා යොමු කර තිබෙන බවයි එම නාවික හමුදා මාධ්‍ය නිවේදනයේ වැඩිදුරටත් දැක්වෙන්නේ.
