ආගම් සහ ජාතීන් අතර ආරවුල් නිර්මාණය වෙමින් පවතින අතර විවිධ භූගෝලීය බල ප්‍රදේශවල ජීවත් වන ජනතාවගේ ජාතිය සහ ආගම ගැන කතා කරමින් මෙම ආරවුල් නිර්මාණය කරන්නේ දේශපාලනඥයින් බව විපක්ෂ නායක සජිත් ප්‍රේමදාස පවසනවා.
ඔවුන්ගේ අපේක්ෂාව ඒ තුළින් ඡන්දය ලබා ගැනීම වන අතර ජනාධිපති සිහින ඇති මෙම පිරිස් ජාතීන් ආගම් අතර ආරවුල් ඇති කිරීමේ අරමුණ 2019 වසරේ දී මෙන් නැවත වරක් ජනතාව රැවටීමට බවයි ඔහු පෙන්වා දෙන්නේ.
විපක්ෂ නායක මේ බව කියා සිටියේ දොඩම්ගස්ලන්ද මාලිගාතැන්න ශ්‍රී ශෛලතලාරාම විහාරස්තානයේ චෛත්‍ය විවෘත කිරීම අවස්ථාවට එක්වෙමින්.
මෙම දේශපාලන නායකයන් සුදුසු ගුණයේ නොපිහිටා කෙසේ හෝ බලය ලබා ගෙන ජනාධිපති අගමැති ධුර ලබා ගැනීමට උත්සාහ කරන අතර ඔවුන් නතාවට බොරු පොරොන්දු ලබා දී බලය ලබා ගැනීමට උත්සාහ කරන බවයි විපක්ෂ නායකවරයා ප්‍රකාශ කළේ.
වෛද්‍ය සාෆි විසින් වඳ සැත්කම් සිදු කළ බවට පසුගිය ජනාධිපතිවරණ සමයේ විවිධ චෝදනා කරමින් ජාති භේද ඇවිස්සූ බවත් අවසානයේ වෛද්‍ය සාෆි නිවැරදි බවට සනාථ වූ බවත් ඒ නිසා සම්බුද්ධ සාසනය සුරක්ෂා කිරීමට නම් සියලුදෙනා ජාති, ආගම්, ජන කොට්ඨාස අතර ඇති බැඳීම ශක්තිමත් කළ යුතු බවයි විපක්ෂ නායකවරයා කියාසිටියේ.
