කොළඹ, වැල්ලවත්ත ප්රදේශයේ පිහිටි සුපිරි මහල් නිවාස සංකීර්ණයක් තුළ දී අපරාධ පරීක්ෂණ දෙපාර්තමේන්තුව විසින් ඊයේ (08) අත්අඩංගුවට ගත් සැකකරුවන් 59 දෙනා අද (09) දිනයේ කොළඹ මහේස්ත්රාත් අධිකරණය හමුවට ඉදිරිපත් කිරීමට නියමිතව තිබුණා.
අත්අඩංගුවට ගැනුණු 59 දෙනාගෙන් 23 දෙනෙක් කාන්තාවන් බවයි පොලිසිය සඳහන් කළේ.
මෙම සැකරුවන් සහ සැකකාරියන් දිවයිනේ විවිධ ප්රදේශවල පදිංචිකරුවන් වන අතර, අදාළ සුපිරි මහල් නිවාස සංකීරණයේ 40වන මහලේ ස්ථානයක් තුළ දී මෙම පිරිස අත්අඩංගුවට ගෙන තිබුණා.
මෙම ස්ථානයේ කිසියම් පිරිසක් විසින් කොරියාවේ සිටින කොරියානු ජාතිකයෙකුගේ මුදල්; මෙරට මුදලින් රුපියල් කෝටි 30කට ආසන්න මුදලක් වංචා කර ඇති බවට ශ්රී ලංකාවේ පිහිටි විදේශීය තානාපති කාර්යාලක් මගින් ලැබුණු පැමිණිල්ලක් මත මෙම වැටලීම සිදුකළ බවයි පොලිස් මාධ්ය ප්රකාශක නියෝජ්ය පොලිස්පති නිහාල් තල්දූව සදහන් කළේ.
අන්තර්ජාලය ඔස්සේ මුදල් කොල්ලකන කඳවුරක් ලෙස මෙම ස්ථානය පවත්වාගෙන ගොස් ඇති බවට අනවරණය වූ බවත්, රුපියල් ලක්ෂ 90 වකට වැඩි මුදලක් මාසික කුලිය ලෙස මෙම ස්ථානයට ගෙවමින් මෙය පවතවාගෙන ගොස් ඇති බවයි පොලිස් මාධ්ය ප්රකාශකවරයා පැවසුවේ.
ඊට අමතරව කිසියම් විදෙස් රටක පිරිසකගේ මෙහෙයවිම මත මෙම ස්ථානය පවත්වාගෙන ගොස් ඇති බවට ද නිරීක්ෂණ වී ඇති බව ඔහු සඳහන් කර සිටියා.
මෙහිදී අත්අඩංගුවට ගැනුණු පිරිස අතර මෙහි අධ්යක්ෂවරිය ලෙස කටයුතු කළ කොළඹ 07 ප්රදේශයේ පදිංචි වයස අවුරුදු 52ක කාන්තාවක් ද සිටින අතර, කළමනාකරුවෙක් ලෙස කටයුතු කළ රාගම ප්රදේශයේ පදිංචි පුද්ගලයෙක් ද සිටින බවයි වාර්තා වුණේ.
