යේමනයේ සානා අගනුවර පාසලක රාමසාන් උත්සවය වෙනුවෙන් සිදු කළ පුණ්‍යාධාර බෙදාදීමක් අතරතුර ඇති වූ තෙරපිමකින් 78 දෙනෙකු පමණ මිය ගොස් තිබෙනවා.
විදෙස් මාධ්‍ය වාර්තා කළේ එක් පුද්ගලයෙකුට ඩොලර් 9 (පවුම් 7) ක පමණ වූ පරිත්‍යාග ලබා ගැනීම සඳහා සිය ගණනක් ජනයා පාසලට රොක් වී ඇති බවයි.
මෙම ආධාර බෙදා හැරීමට වගකිවයුත්තන් ආරක්ෂක අංශ රඳවාගෙන ඇති අතර සිද්ධිය පිළිබඳ පරීක්ෂණයක් ක්‍රියාත්මක බවයි යේමන අභ්‍යන්තර කටයුතු අමාත්‍යාංශය ප්‍රකාශ කළේ.
අනතුරින් තවත් විශාල පිරිසක් තුවාල ලබා ඇති අතර ඉන් 13 දෙනෙකු අසාධ්‍ය තත්වයේ සිටින බව සානා හි සෞඛ්‍ය නිලධාරියෙක් සඳහන් කර තිබෙනවා.
ඇසින් දුටු සාක්ෂිකරුවන් දෙදෙනෙකු උපුටා දක්වමින් ඇසෝසියේටඩ් ප්‍රෙස් ප්‍රවෘත්ති ඒජන්සිය, කියා සිටියේ හවුති සටන්කාමීන් රැස්ව සිටි ජනතාව පාලනය කිරීමේ උත්සාහයක් ලෙස අහසට වෙඩි තැබූ බවයි.
එම වෙඩි විදුලි රැහැනකට වැදී පිපිරීමක් සිදු වීම හේතුවෙන් ඇති වූ බිය හමුවේ තෙරපීම සිදුව ඇති බවටයි විශ්වාස කෙරෙන්නේ.
2015 දී හවුති සටන්කාමීන් රටේ බටහිර ප්‍රදේශයේ විශාල ප්‍රදේශයක පාලනය අත්පත් කර ගැනීමත් සමඟ හටගත් ගැටුම් හමුවේ යේමනය විනාශයට පත්ව තිබෙනවා.
ජනාධිපති Abdrabbuh Mansour Hadi විදේශගත වූ අතර සවුදිය ප්‍රමුඛ අරාබි රාජ්‍ය සන්ධානයක් ඔහුගේ පාලනය යථා තත්ත්වයට පත් කිරීමට මැදිහත් වුණා.
මෙම සටන නිසා 150,000 කට වැඩි පිරිසක් මිය ගොස් ඇති අතර මිලියන 23 කට වැඩි ජනතාවක් එනම් යේමනයේ ජනගහනයෙන් හතරෙන් තුනකට පමණ පිරිසකට ආධාර අවශ්‍ය බවටයි විශ්වාස කෙරෙන්නේ.
පසුගිය සතියේ යේමනයේ සටන් කරන පාර්ශ්ව අතර ප්‍රධාන සිරකරුවන් හුවමාරුවක් ආරම්භ වූ අතර එය වසර අටක විනාශකාරී ගැටුම අවසන් කිරීමේ උත්සාහයේ කොටසක් ලෙස ද සැලකෙනවා.
