ලක්ෂ ගණනක් වටිනාකමකින් යුත් මැණික් ගල් කිහිපයක් විකිණීමට ඇති බවට වට්ස්ඇප් මගින් ඡායාරූප යවා ඒවා මිලදී ගැනීමට පැමිණි දෙදෙනෙකු බිය ගන්වා සිරකර ගෙන ඔවුන් සතු දේපළ කොල්ලකෑ බව කියන යුධ හමුදා සෙබළෙකු ඇතුළු තුන්දෙනෙකු ගිරාඳුරුකෝට්ටේ ප්රදේශයේදී පොලිස් අත්අඩංගුවට ගෙන තිබෙනවා.
මෙම සැකකරුවන් තමන් යුද හමුදා බුද්ධි අංශ සාමාජිකයන් බව පවසා මෙම කොල්ලය සිදු කර ඇති බවටයි අනාවරණ වී ඇත්තේ.
අත්අඩංගුවට පත් සැකකරුවන් ගිරාඳුරුකෝට්ටේ සහ ගින්නෝරුව යන ප්රදේශවල පදිංචි වයස අවුරුදු 25, 30 සහ 34 හැවිරිදි පිරිසක්.
34 හැවිරිදි සැකකරු වව්නියාව ප්රදේශයේ යුධ හමුදා කඳවුරක සේවයේ යෙදී සිට රාජකාරි කරන අයෙකු බවට පොලිසිය අනාවරණ කරගෙන තිබෙනවා.
පසුගිය 10 වනදා මීගමුව සහ අනුරාධපුර යන ප්රදේශවල පදිංචි පුද්ගලයන් දෙදෙනෙකු පෙර දැනුම්දීමක් මත මෙම මැණික් ගල් මිලදි ගැනීමට මහියංගණය වෙත පැමිණීමෙන් අනතුරුව සැකකරුවන් ඔවුන් දෙදෙනාට දුරකථන ඇමතුමක් ලබාදී ඇතැයි සඳහන්.
එම දුරකථන ඇමතුම ගත් සැකකරු මෙම පුද්ගලයන් දෙදෙනා ගිරාඳුරුකෝට්ටේ නගරයට ගෙන්වා ගෙන මැණික් ගල් ඇත්තේ සුනිල් මාමා නමැත්තෙකුගේ නිවසේ බව පවසා එම නිවසට කැඳවා ගෙන ගොස් තිබුණා.
එහිදී ප්ලාස්ටික් බෝතලයක තිබූ මැණික් බවට පැවසු ගල් දෙකක් පෙන්වා ඇති බවටයි පොලිසියට කරුණු හෙළිවී ඇත්තේ.
එම ගල් පරීක්ෂා කරමින් සිටියදී තමන් යුද හමුදා බුද්ධි අංශයේ සාමාජිකයන් බව පවසා කඩා පැන ඇති අනෙක් සැකකරුවන් මෙම පුද්ගලයන් දෙදෙනා බිය කර දණ ගස්වා පහරදී ඔවුන් සතුව තිබූ යතුරුපැදියේ යතුර සහ ලිය කියවිලි, මුදල් පසුම්බි සහ ජංගම දුරකථන පැහැරගෙන තිබුණා.
අනතුරුව මැණික් මිලදී ගැනීමට ගෙනා මුදල් ඉල්ලා දින කිහිපයක් තැන් තැන්වලට රැගෙන යමින් සිට ඇති මුදල් රැගෙන නොආ බව පැවසීමෙන් පසු නිවෙස්වලට කතාකර මුදල් ගෙන්වා ගන්නා ලෙසටයි ඔවුන්ට බල කර ඇත්තේ.
ඊට ද ප්රතිචාර නොදැක්වීම හේතුවෙන් පසුගිය 12 වනදා රාත්රී 12ට පමණ තමන් දෙදෙනාව මහියංගණය නගරය වෙත ගෙනැවිත් දැමූ අතර අක්කරෙයිපත්තු සිට මීගමුව බලා යැමට පැමිණි බස් රථයේ නැගී මීගමුවට පැමිණි බව ද ඔවුන් පොලිසිය වෙත අනාවරණය කර තිබෙනවා.
පසුව යතුරුපැදිය රැගෙන යාමට ගිරාඳුරුකෝට්ටේ පොලිසිය අසලට පැමිණෙන ලෙසට මැණික් මිලදී ගැනීමට ගිය දෙදෙනාට සැකකරුවන් දැනුම්දීමක් කර තිබූ බව සඳහන්.
තමන් එලෙස නොගොස් ඊයේ (15) මේ පිළිබඳ ගිරාඳුරුකෝට්ටේ පොලිසියට පැමිණිල්ලක් ඉදිරිපත් කළ බවයි ඔවුන් ප්රකාශ කළේ.
අනතුරුව තමන්ව රඳවා ගෙන සිටි බව කියන නිවසක් පොලිසියට පැමිණිලිකරුවන් විසින් පෙන්වා ඇති අතර එම නිවස මීට පෙර එම පොලිස් බල ප්රදේශයේ සිදුවු අපරාධ රැසකට සම්බන්ධ සැකකරුවෙකුගේ නිවසක් බව පොලිසිය හෙළි කරගෙන තිබෙනවා.
ඒ අනුව මෙම සිද්ධියට සම්බන්ධ සැකකරුවන් තුන්දෙනා අත්අඩංගුවට ගෙන ඇති අතර ඔවුන් සතුව තිබී පැහර ගත් බව කියන යතුරුපැදිය, එහි ලිය කියවිලි, බැංකු කාඩ්පත්, මුදල් පසුම්බි සහ ජංගම දුරකථන ද සොයාගත් බවයි පොලිසිය ප්රකාශ කළේ.
