නාරම්මල, දම්පලැස්ස ප්‍රදේශයේ දී පසුගියදා සිවිල් ඇඳුමෙන් සැරසුණු පොලිස් නිලධාරියෙකුගේ වෙඩි ප්‍රහාරයකින් ජීවිතක්ෂයට පත් වූ රොෂාන් කුමාරසිරිගේ අවසන් කටයුතු අද (21) සිදුකෙරුණා.
ඒ, ප්‍රදේශවාසීන් ඇතුළු විශාල පිරිසකගේ සහභාගීත්වයෙන් නාරම්මල, වෙන්නරුව පොදු සුසාන භූමියේ දීයි.
ඔහුගේ අවසන් කටයුතු සිදුකර අවස්ථාවේ දී එම ප්‍රදේශය අවට දැඩි පොලිස් ආරක්ෂාවක් යොදවා තිබූ බවයි අප වාර්තාකරු සඳහන් කළේ.
පසුගිය 18 වනදා පොලිස් අණ නොතකා ධාවනය කළ ලොරි රථයක් හඹා ගිය සිවිල් ඇඳුමෙන් සැරසුණු පොලිස් නිලධාරීන් දෙදෙනෙක් එම ලොරි රථය දම්පලැස්ස ප්‍රදේශයේ නවත්වාගෙන තිබුණා.
එහිදී සිදුකළ පරීක්ෂා කිරීම් අතර තුර දී උප පොලිස් පරීක්ෂකවරයෙක් සිදුකළ වෙඩි තැබීමේ දී එහි රියදුරු ලෙස කටයුතු කළ රොෂාන් කුමාරසිරි ජීවිතක්ෂයට පත් වුණා.
මෙලෙස මියගිය 41 හැවිරිදි රොෂාන් කුමාරසිරි මහරච්චියමුල්ල ප්‍රදේශයේ පදිංචිව සිටි අතර, ඔහු දරුවන් තිදෙනෙකුගේ පියෙක්.
