2022 වසරේදී පාකිස්තාන හමුදාව විසින් බලුකිස්තානයේ 629 දෙනෙකු බලහත්කාරයෙන් අතුරුදහන් කර, 195 දෙනෙකු නීති විරෝධී ලෙස ඝාතනය කර තවත් 187 දෙනෙකුට වධ හිංසා පමුණුවා ඇති බවට බලුකිස්තාන ජාතික ව්‍යාපාරයේ මානව හිමිකම් සංවිධානය වන පාංක් (Paank) විසින් නිකුත් කරන ලද වාර්ෂික වාර්තාව මගින් හෙළි කර තිබෙනවා.
මේ අනුව, 2022 ජනවාරි මාසයේදී බලහත්කාරයෙන් අතුරුදහන් කිරීම් 92 ක්, මිනීමැරුම් 15 ක් සහ පුද්ගලයෙකුට වධහිංසා පමුණුවීමේ සිදුවීමක් පකිස්ථාන හමුදාව විසින් සිදුකර තිබෙනවා.
පෙබරවාරි මාසයේදී වාර්තා වී ඇති සිදුවීම් අතරට බලහත්කාර අතුරුදහන් කිරීම් 95 ක්, මිනීමැරුම් 42 ක් සහ වධහිංසා පැමිණවීම් 5ක් ඇතුළත්.
Paank වාර්තාවට අනුව, බලහත්කාරයෙන් අතුරුදහන් වූ පුද්ගලයින් 187 දෙනෙකු පසුගිය වසරේ පකිස්ථාන වධක මැදිරිවලින් නිදහස ලැබූවන්.
2022 වසර බලුකිස්තානයේ සමූහ දඬුවම්, බලහත්කාරයෙන් අතුරුදහන් කිරීම්, මිනීමැරුම්, සමූලඝාතන සහ ප්‍රචණ්ඩත්වයෙන් සහ ඛේදවාචකයන්ගෙන් පිරී ඇති බවද අදාළ වාර්තාවේ සඳහන් වනවා.
ත්‍රස්ත මර්දන දෙපාර්තමේන්තුව සහ පකිස්තාන හමුදාව යටතේ ඇති ෆ්‍රන්ටියර් බලකාය බලුකිස්තානයේ කාන්තාවන් සහ ළමුන් ඇතුළු සියගණනක් බලහත්කාරයෙන් යටත් කර ගැනීමේ සිදුවීම්ද වාර්තා වී තිබෙනවා.
බලුකිස්තාන ජාතිකවාදී පක්ෂවලට සම්පූර්ණ තහනමක් පනවා ඇති බවත් දේශපාලන නිදහස ඇත්තේ පාකිස්තාන හමුදාවට සහ හමුදාවට හිතවත් කණ්ඩායම්වලට පමණක් බවත් එම වාර්තාවේ සඳහන්.
පාකිස්ථානයේ අතුරුදන්වූවන් පිළිබඳ කොමිසම පසුගියදා පාකිස්ථාන ශ්‍රේෂ්ඨාධිකරණයට ඉදිරිපත් කළ වාර්තාවක දැක්වුණේ අතුරුදහන් වූ පුද්ගලයන් 974 දෙනෙකු රැඳවුම් මධ්‍යස්ථානවල සිටි අය වන අතර 616 දෙනෙකු බන්ධනාගාරවල රැඳී සිටි පිරිස බවයි.
