තාප්පයකට යට වී ග්‍රෑන්ඩ්පාස් ප්‍රදේශයේ අයෙක් ජීවිතක්ෂයට (වීඩියෝ)

ග්‍රෑන්ඩ්පාස් පොලිස් වසමේ ශාන්ත ජෝශප් විදියේ නිවසක තාප්පයක් කඩා වැටීමෙන් පුද්ගලයෙකු මියගොස් ඇති බව පොලිසිය පවසනවා.

ඊයේ (21) රාත්‍රියේ සිදු වූ මෙම අනතුරින් මියගොස් ඇත්තේ 55 හැවිරිදි ග්‍රෑන්ඩ්පාස් ප්‍රදේශයේ පදිංචි අයෙක් බවයි වාර්තා වන්නේ.

වයස්ගත පුද්ගලයෙකුට උපස්ථාන කිරීම සඳහා අදාළ පුද්ගලයා එම නිවසට පැමිණ ඇති අතර,එහිදී ඔහු නිවසින් පිටත පිහිටි වැසිකිළිය වෙත ගොස් සිටිය දී නිවසේ ආරක්ෂාවට ඉදිකර තිබූ මායිම් තාප්පය කඩා වැටීමෙන් මෙම අනතුර සිදුව ඇති බවටයි අනාවරණය වී ඇත්තේ.

පොලිසිය සහ ප්‍රදේශවාසීන් එක්ව වහාම ක්‍රිරයාත්මක වී තාප්පයට යටව සිටි පුද්ගලයා ඉන් මුදාගෙන රෝහල් ගත කිරීමට කටයුතු කර ඇති අතර එහිදී ඔහු ජීවිතක්ෂයට පත්ව තිබෙනවා.

මෘත ශරීරය මේ වනවිට කොළඹ ජාතික රෝහලේ තැන්පත්කර ඇති බවයි පොලිසිය වැඩිදුරටත් සඳහන් කළේ.