අමෙරිකා එක්සත් ජනපදයේ 47 වැනි ජනාධිපතිවරයා ලෙස අද (06) දෙවැනි වරටත් ජනාධිපති ධුරයට තේරීපත් වූ ඩොනල්ඩ් ට්‍රම්ප් හට විදෙස් ජනාධිපතිවරු සහ අගමැතිවරු සිය සුබාශිංසන එක් කර තිබෙනවා.
ඩොනල්ඩ් ට්‍රම්ප්ගේ ජයග්‍රහණයට මෙරට ජනාධිපති අනුර කුමාර දිසානායක මහතාගෙන් ද සුබ පැතුම් එක් ව ඇති බවයි ජනාධිපති මාධ්‍ය අංශය පැවසුවේ.
එහි සඳහන් ව ඇත්තේ මෙවැන්නක්;
“අමෙරිකා එක්සත් ජනපදයේ 47 වැනි ජනාධිපතිවරයා ලෙස වැඩි ඡන්ද ප්‍රමාණයක්
ලබා ගනිමින් තේරී පත් වූ ඩොනල්ඩ් ජේ. ට්‍රම්ප් වෙත උණුසුම් සුබ පැතුම් පිරිනමමි. ශ්‍රී ලංකාවේ සහ එක්සත් ජනපදයේ ජනතාවට ප්‍රයෝජනවත් වන අපගේ සබඳතාවල පොදු අරමුණු සාක්ෂාත් කර ගැනීම සඳහා ඔබ සමඟ සම්බන්ධව කටයුතු කිරීමට මම බලාපොරොත්තු වෙමි..” යනුවෙන් එහි සඳහන්.
එමෙන්ම ශ්‍රී ලංකා හිටපු ජනාධිපති රනිල් වික්‍රමසිංහ සහ හිටපු විපක්ෂ නායක සජිත් ප්‍රේමදාස මහතා ද ට්‍රම්ප්ගේ ජයග්‍රහණය වෙනුවෙන් සුබ පැතුම් පිරිනමා තිබෙනවා.
ට්‍රම්ප්ගේ ජයග්‍රහණයට සුබ පැතුම් පිරිනමමින් ඉන්දීය අග්‍රාමාත්‍යවරයා ද X සටහනක් තබා තිබෙනවා.
මෝදි පවසා ඇත්තේ; තමන්ගේ මිත්‍රයා වන ට්‍රම්ප් හට ලැබූ ජයග්‍රහණයට හදවතින් ම සුබ පතන බවයි.
එහි වැඩිදුරටත් ඇත්තේ මෙවැන්නක්..,
”ඔබේ ඓතිහාසික මැතිවරණ ජයග්‍රහණය ගැන. ඔබ ඔබේ පෙර වාරයේ සාර්ථකත්වයන් මත ගොඩනඟන විට, ඉන්දියා – එක්සත් ජනපද විස්තීර්ණ ගෝලීය සහ උපායමාර්ගික හවුල්කාරිත්වය තවදුරටත් ශක්තිමත් කිරීම සඳහා අපගේ සහයෝගීතාව අලුත් කිරීමට මම බලාපොරොත්තු වෙමි. එක්ව, අපගේ ජනතාවගේ අභිවෘද්ධිය සඳහා සහ ගෝලීය සාමය, ස්ථාවරත්වය සහ සමෘද්ධිය ප්‍රවර්ධනය කිරීමට කටයුතු කරමු..” යනුවෙන් එහි සඳහන්.
මීට අමතරව ප්‍රංශ ජනාධිපති එමෑනුවෙල් මැක්‍රෝන්, යුක්‍රේන ජනාධිපති ව්ලොදිමිර් සෙලෙන්ස්කි ඇතුළු රාජ්‍ය නායකයින් රැසක් සුබ පතා තිබෙනවා.
එමෙන්ම ඩොනල්ඩ් ට්‍රම්ප් සිය ජයග්‍රහණයෙන් පසුව ජාතිය අමතමින් විශේෂ ප්‍රකාශයක් ද සිදු කරනු ලැබුවා.
නව ජනාධිපතිවරයා වශයෙන් තමන්ව තෝරාපත් කරගත්, ඒ සඳහා ජන වරම ලබා දුන් සෑම අමෙරිකානු පුරවැසියෙකුට ම ස්තුතිය සහ ගෞරවය පිරිනමන බවත් ට්‍රම්ප් ජනාධිපතිවරයා පෙන්වා දුන්නා.
තමන් අසාර්ථක වූ පසුගිය වසර කිහිපයේදී මගහැරුණු සෑම ප්‍රාන්තයකම තමන් ජය අත්පත් කරගැනීම අමෙරිකානු ඉතිහාසයේ විශාල වෙනසක් ඇති කිරීමට මෙම දේශපාලන ව්‍යාපාරය සමත් ව ඇති බවයි ට්‍රම්ප් විශ්වාස කරන්නේ.
එබැවින් ඉදිරියේ දී සෑම අමෙරිකානුවෙකුගේ ම සාමය, අභිවෘද්ධිය, අධ්‍යාපනය සහ දියුණුව සාක්ෂාත් කරලීමටත්, තම හුස්ම ඇති තෙක් අමෙරිකානු පුරවැසියා වෙනුවෙන් පෙනී සිටින බව ද 47 වැනි ජනාධිපතිවරයා ලෙස තේරී පත් වූ ජනාධිපති ට්‍රම්ප් ප්‍රකාශ කර සිටියා.
එමෙන්ම ඉදිරියේ දී අමෙරිකාවේ මෙන් ම ගෝලීය සාමය ආරක්ෂා කිරීමටත්, කිසිදු යුද්ධයක් ඇති නොවීමටත් තමන් කටයුතු කරන බවයි ට්‍රම්ප් සිය පුරවැසියන්ට පොරොන්දු වූයේ.
