දිවයිනේ සියලුම ගල් අඟුරු බලාගාර පූර්ණ ධාරිතාවයෙන් ජනනය වන බව සහ ජාතික විදුලිබල පද්ධතියට සම්බන්ධ කර ඇති බව මහජන උපයෝගීතා කොමිසම මාධ්‍යයට පවසයි.
එසේම වෘත්තීය සමිති ක්‍රියාමාර්ග හේතුවෙන් ඇතැම් ජල විදුලි බලාගාර ක්‍රියාත්මක නොවෙන බව ද එම කොමිසමේ සභාපති, ජනක රත්නායක මහතා සඳහන් කර සිටී.
ඒ අතරම විදුලිබල මණ්ඩලයේ ඉංජිනේරු සංගමය ඇතුළු වෘත්තීය සමිති කිහිපයක් ක්‍රියාත්මක කළ වෘත්තීය සමිති ක්‍රියාමාර්ගය නතර කිරීමට තීරණය කර තිබේ.
ලංකා විදුලිබල මණ්ඩල ඉංජිනේරු සංගමයේ සභාපති අනිල් රංජිත් මහතා සඳහන් කළේ, ජනාධිපති ගෝඨාභය රාජපක්ෂ මහතා සමග ඊයේ (08) රාත්‍රී පැවැත්වු සාකච්ඡාවකින් අනතුරුව වැඩ වර්ජනය නතර කිරීමට තීරණය කළ බවය.
විදුලිබල පනතට ගෙන එන සංශෝධනවලට විරෝධය පළ කරමින් ලංකා විදුලිබල මණ්ඩලයේ ඉංජිනේරු සංගමය ඇතුළු සංගම් කිහිපයක් ඊයේ මධ්‍යම රාත්‍රී සිට වැඩ වර්ජනයක නිරතවීමට තීරණය කර තිබුණි.වැඩ වර්ජනය හේතුවෙන් අද (09) උදෑසන 8.00 වන විට දිවයින පුරා විදුලිය විසන්ධි වීමක් සිදුවනු ඇති බව අදාළ වෘත්තීය සමිති සඳහන් කළේය.
නමුත් මේ වන විට දිවයිනේ ප්‍රදේශ රැසක විදුලිබලය ඇනහිට ඇති බවට වාර්තා වේ.විදුලි ඉංජිනේරු සංගමය වැඩවර්ජනයක් ක්‍රියාත්මක කිරීමට ගනු ලැබූ තීරණය හේතුවෙන් විදුලිබලය ඇනහිටීම් සිදුව ඇති බව වාර්තා වෙයි.
