නේපාලයට බලපෑ විනාශකාරී ගංවතුරෙන් පසු සහන සහ ප්‍රතිසාධන කටයුතු සඳහා සහායවීමට, නේපාලයට ඇමරිකානු ඩොලර් මිලියනයක මුදලක් පරිත්‍යාග කරන බව ජනාධිපති අනුර කුමාර දිසානායක පසුගිය දා ප්‍රකාශ කළා.
ඊට අදාළවන අනුමැතිය ද පසුගිය සතියේ රැස් වූ කැබිනට් මණ්ඩලය විසින් ලබා දුන්නා.
ඒ, අනුව එම ඇමරිකානු ඩොලර් මිලියනයක මූල්‍ය පරිත්‍යාගය නේපාල රජය වෙත අද (09) ලබා දී තිබෙනවා.
ශ්‍රී ලංකා රජය වෙනුවෙන් නේපාලයේ ශ්‍රී ලංකා තානාපතිනි රුවන්ති දෙල්පිටිය විසින් කත්මණ්ඩු නුවරදී නේපාල විදේශ අමාත්‍ය ෂිසිර් ඛනාල් වෙත මෙම මුදල භාරදීම සිදුකර ඇති බවයි වාර්තා වුණේ.
මෙහිදී ශ්‍රී ලංකා රජය වෙනුවෙන් නේපාල ජනතාව කෙරෙහි ගැඹුරු සංවේගය සහ සහයෝගීතාවය නැවත අවධාරණය කළ තානාපතිනිය, ව්‍යසනයෙන් තම ආදරණීයයන් අහිමි වූ පවුල්වලට හෘදයාංගම ශෝකය පළකර තිබෙනවා.
නේපාල රජයේ අඛණ්ඩ මානුෂීය, සහන සහ ප්‍රතිසාධන කටයුතු සඳහා සහාය වීම සහ ගංවතුර සහ නායයෑම්වලින් පීඩාවට පත් ප්‍රජාවන්ට සහාය වීම මෙම මූල්‍ය ආධාරයේ අරමුණයි.
