ඡන්ද ගණන් කිරීමේ මධ්‍යස්ථානවල රැඳී සිටින පක්ෂ නියෝජිතයින් පත් කළ යුතු බව මැතිවරණ කොමිසම අදාළ දේශපාලන පක්ෂවලට දැනුම් දී තිබෙනවා.
ඡන්ද ගණන් කිරීමේ මධ්‍යස්ථානවල ස්ථානගත කිරීම සඳහා සෑම පක්ෂයකටම නියෝජිතයින් 07 දෙනෙකු පත් කළ හැකි බවයි මැතිවරණ කොමිෂන් සභාව දැනුම් දෙන්නේ.
සෑම දේශපාලන පක්ෂයක්ම සාමාන්‍ය ඡන්ද ගණන් කිරීමේ මධ්‍යස්ථානයක් සඳහා නියෝජිතයින් 05 දෙනෙකු සහ තැපැල් ඡන්ද ගණන් කිරීමේ මධ්‍යස්ථානයක් සඳහා තවත් නියෝජිතයින් දෙදෙනෙකු පත් කළ යුතුයි.
ඒ සඳහා අවශ්‍ය ලියකියවිලි නියමිත වේලාවට ඉදිරිපත් කර ඡන්ද ගණන් කිරීමේ මධ්‍යස්ථාන පරිශ්‍රයට ඇතුළු වීමට අවසර ලබා ගැනීමෙන් දේශපාලන පක්ෂයට ද සමස්ත ක්‍රියා පටිපාටිය වඩාත් පහසු වනු ඇති බවයි මැතිවරණ කොමිෂන් සභාව සඳහන් කළේ.
මේ අතර සෑම දේශපාලන පක්ෂයකට සහ ස්වාධීන කණ්ඩායමකට එක් ඡන්ද මධ්‍යස්ථානයක් සඳහා තම නියෝජිතයින් දෙදෙනෙකු බැගින් පත් කළ හැකියි.
එම නියෝජිතයින්ට ඡන්ද මධ්‍යස්ථානයට ඇතුළුවීමට අවසර ලැබෙන්නේ බලයලත් නිලධාරියෙකුගේ අත්සන සහිත ලිපියක් ඔවුන් සතුව ඇත්නම් පමණයි.
ඒ අනුව මෙම අදාළ ලිපි ලේඛන නියමිත වේලාවට සකස් කර ගන්නා ලෙස මැතිවරණ කොමිෂන් සභාවේ සභාපතිවරයා සියලු දේශපාලන පක්ෂ සහ ස්වාධීන කණ්ඩායම්වලට දැනුම් දෙනවා.
