ගත වූ පැය 24ක කාලය තුළ දිවයිනේ විවිධ ප්‍රදේශවල සිදු වූ රිය අනතුරුවලින් පුද්ගල‍යින් තිදෙනකු ජීවිතක්ෂයට පත් ව තිබෙනවා.
මින් පළමු අනතුර වාර්තා වන්නේ නොච්චියාගම – 27 හන්දිය තඹුත්තේගම මාර්ගයේ කිලෝමීටර් 04 කණුව ආසන්න ප්‍රදේශයේ දියි.
තඹුත්තේගම දෙස සිට නොච්චියාගම දෙසට ධාවනය වූ පෞද්ගලික බස් රථයක් ඊට ප්‍රතිවිරුද්ධ දෙසට ධාවනය වූ ත්‍රීරෝද රථයක මුහුණට මුහුණ ගැටී තිබෙනවා.
එම අනතුරින් ත්‍රීරෝද රථයේ රියදුරු, පිටුපස අසුනේ ගමන් කළ කාන්තාවක් හා පුද්ගලයෙකු බරපතළ තුවාල ලබා තඹුත්තේගම රෝහලට ඇතුළත් කෙරුණා.
අනතුරින් ජීවිතක්ෂයට පත් ව ඇත්තේ 41 හැවිරිදි ත්‍රිරෝද රථයේ පසුපස අසුනේ ගමන් කළ නොච්චියාගම ප්‍රදේශයේ ම පදිංචිකරුවෙක්.
මේ අතර ඊයේ හංවැල්ල – ඇඹුල්ගම පනාගොඩ මාර්ගයේ ජල්තර ජනසවි මාවතට හැරෙන හන්දිය අසල දී සිදු වූ රිය අනතුරකින් 20 හැවිරිදි තරුණයෙකු ජීවිතක්ෂයට පත් වුණා.
පනාගොඩ දෙස සිට ඇඹුල්ගම දෙසට ධාවනය වූ ලොරි රථයක් වම් පසට ඇති අතුරු මාර්ගයට හැරවීමට යාමේ දී පිටුපසින් පැමිණි යතුරුපැදියක් ලොරි රථයට වම් පසින් ඉස්සර කිරීමට යාමේ දී ලොරි රථයේ ගැටී මෙම අනතුර සිදු ව ඇති බවයි වාර්තා වන්නේ.
අනතුරින් යතුරුපැදියේ ගමන් කළ පසුපැදිකරු ද බරපතළ තුවාල ලබා රෝහල්ගත කෙරුණා.
මියගොස් ඇත්තේ වහරක – රුවන්වැල්ල ප්‍රදේශයේ පදිංචිකරුවෙක්.
මේ අතර අඟලවත්ත – බදුරලිය මාර්ගයේ බෙල්ලන ප්‍රදේශයේ දී සිදු වූ රිය අනතුරකින් 57 හැවිරිදි වියෙහි පසු වූ අයෙක් ජීවිතක්ෂයට පත් ව තිබෙනවා.
අඟලවත්ත දෙසට ධාවනය වෙමින් පැවති ධාවනය වු යතුරුපැදියක් මාර්ගයේ වම් පසින් ගමන් ගත් පදිකයෙකුගේ ගැටීමෙනුයි මෙම අනතුර සිදුවුණේ.
යතුරුපැදිකරු ද අනතුරින් බරපතළ තුවාල ලබා වැඩිදුර ප්‍රතිකාර සඳහා නාගොඩ රෝහලට ඇතුළත් කර තිබෙනවා.
