ගාල්ල නගරයේ බාලිකා පාසලක උසස්පෙළ විභාග මධ්‍යස්ථානයේදී ඊයේ පැවති ගිණුම්කරණය පළමු ප්‍රශ්න පත්‍රය සඳහා පෙනී සිටි සිසුවියන්ට අසාධාරණයක් සිදුවී ඇතැයි දෙමව්පියන් චෝදනා කරනවා.
ඔවුන් පෙන්වා දෙන්නේ තම දරුවන් ප්‍රශ්න පත්‍රයට පිළිතුරු ලබාදෙමින් සිටියදී ශාලාධිපතිනිය විසින් සිසුවියන්ගේ ගණක යන්ත්‍ර ලබාගෙන ඇති බවයි.
ඊට හේතුව වී ඇත්තේ විභාග අපේක්ෂකයින් කිහිපදෙනෙකු අනුමත නොකරන ලද ගණක යන්ත්‍ර විභාග ශාලාව තුළට ගෙන ඒම බව සඳහන්.
අධ්‍යාපන බලධාරීන් මෙම සිද්ධිය දැනුවත් කිරීමෙන් අනතුරුව පැයකට පමණ කාලයකට පසු ශාලාධිපතිනිය විසින් යළිත් වරක් ගණක යන්ත්‍ර අදාළ විභාග අපේක්ෂකයින්ට ලබාදීමට පියවර ගෙන තිබෙනවා.
එහෙත් දරුවන්ගේ දෙමාපියන් චෝදනා කරන්නේ, ගණක යන්ත්‍ර යළි තෝරා ගැනීම සඳහා කාලයක් ගතවී ඇතත් පිළිතුරු ලිවීමට දරුවන්ට අමතර කාලයක් ශාලාධිපතිනිය විසින් ලබාදී නොමැති බවයි.
ඒ හේතුවෙන් තම දරුවන්ට බලවත් අසාධාරණයක් සිදුවු බවයි දෙමාපියන් පවසන්නේ.
