රුපියල් තුන්කෝටි හැට හතර ලක්ෂ අසූ දහසක් වටිනා “හෂීෂ්” සහ “කුෂ්” මත්ද්රව්ය තොගයක් මෙරටට රැගෙන විත්, කටුනායක ගුවන් තොටුපොළෙන් පිට කරගෙන යමින් සිටි විදේශිකයෙකු අද (21) දින දහවල් ගුවන් තොටුපොළ පොලිස් මත්ද්රව්ය කාර්යාංශයේ නිලධාරීන් පිරිසක් විසින් අත්අඩංගුවට ගනු ලැබුවා.
අප ගුවන්තොටුපොළ වාර්තාකරු පැවසුවේ මොහු උතුරු අයර්ලන්තයේ වාසය කරන 32 හැවිරිදි බ්රිතාන්ය ජාතිකයෙකු වන අතර ඔහු එරට කරාතේ සටන් ශිල්පය උගන්වන ගුරුවරයෙක් බවයි.
සැකකාර ගුවන් මගියා අද පෙරවරු 11.06 ට තායිලන්තයේ බැංකොක් නුවර සිට ශ්රී ලන්කන් ගුවන් සේවයේ යූ.එල්.- 403 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
ඔහු විසින් රැගෙන එන ලද ගමන් මළු දෙකක් තුළ “හෂීෂ්” මත්ද්රව්ය කිලෝග්රෑම් 01යි ග්රෑම් 370 ක් සහ “කුෂ්” මත්ද්රව්ය ග්රෑම් 908ක් සඟවා ගෙන සිටියදී , පොලිස් මත්ද්රව්ය කාර්යාංශයේ නිලධාරීන් විසින් අත්අඩංගුවට ගැනුණා.
මොහු ලෝකයේ විවිධ රටවල සංචාරය කර ඇති පුද්ගලයෙකු බව, ඔහුගේ ගමන් බලපත්රය ඇසුරෙන් සිදු කළ විමර්ශනවල දී අනාවරණය කරගෙන තිබෙනවා.
මෙම බ්රිතාන්ය ජාතිකයා අද මීගමුව මහේස්ත්රාත් අධිකරණය වෙත ඉදිරිපත් කර ජනවාරි 27 වැනි දින දක්වා රඳවා තබාගෙන ප්රශ්න කිරීමට නියමිතයි.
