ක්රිෂ් ගනුදෙනුව සම්බන්ධයෙන් අල්ලස් කොමිසම විසින් කොළඹ ප්රධාන මහේස්ත්රාත් අධිකරණයේ ගොනු කර ඇති නඩුවේ සිව්වන විත්තිකරු ලෙස ශ්රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ නම් කර තිබෙනවා.
ඒ අනුව සැකකාර නාමල් රාජපක්ෂ ලබන 06 වනදා අධිකරණට ඉදිරිපත් කරන ලෙස කොළඹ ප්රධාන මහේස්ත්රාත් අධිකරණය නියෝග කරනු ලැබුවා.
මෙම විමර්ශනයට අදාළව ඉකුත්දා අල්ලස් කොමිසම විසින් කොළඹ මහේස්ත්රාත් අධිකරණයට දැනුම් දී තිබුණේ මෙම සිද්ධියේ සැකකරුවකු වශයෙන් පාර්ලිමේන්තු මන්ත්රී නාමල් රාජපක්ෂ හඳුනාගෙන තිබෙන බවයි.
ඒ අනුව අධිකරණයෙන් ලබාගත් නියෝගයකට අනුව බන්ධනාගාරගතව සිටින පාර්ලිමේන්තු මන්ත්රී නාමල් රාජපක්ෂ මහතාගෙන් එම කොමිසමේ නිලධාරීන් විසින් ප්රකාශයක් ද සටහන් කරනු ලැබුවා.
ඉන් අනතුරුව අදාල නඩුකරයේ විත්තිකරුවෙකු වශයෙන් නාමල් රාජපක්ෂ මහතා නම් කිරීමට තීරණය කර තිබෙනවා.
මෙම සිද්ධිය සම්බන්ධයෙන් ඉකුත්දා අත්අඩංගුවට ගනු ලැබූ ක්රිෂ් සමාගමේ හිටපු අධ්යක්ෂවරියක වශයෙන් කටයුතු කළ ජානකී සිරිවර්ධන ඔක්තෝබර් මස 06 වනදා දක්වා රක්ෂිත බන්ධනාගාර ගත කිරීමට ද කොළඹ ප්රධාන මහේස්ත්රාත් අධිකරණය නියම කර තිබෙනවා.
කොටුව ට්රාන්ස්වර්ක් චතුරස්රයේ පිහිටි ඉඩම මිශ්ර ව්යාපෘතියක් සඳහා ඉන්දියානු ක්රිෂ් සමාගමට ලබාදීමට අදාළ කටයුතු ඉටු කර ගැනීම සඳහා පාර්ලිමේන්තු මන්ත්රී නාමල් රාජපක්ෂට රුපියල් මිලියන 70 ක අල්ලසක් ලබාදීමේ සිද්ධියක් සම්බන්ධයෙන් එම සමාගමේ හිටපු අධ්යක්ෂිකා ජානකී සිරිවර්ධන ඉකුත්දා අල්ලස් කොමිසම විසින් අත් අඩංගුවට ගෙන තිබුණා.
