එළඹෙන උත්සව සමය තුළ වෙළදපොළට නිකුත්කිරීමට සූදානම්කරමින් තිබූ නිෂ්පාදිත දිනය, කල් ඉකුත්වන දිනය ඇතුළු තොරතුරු වෙනස්කරන ලද ආනයනික කඩල, සහල් සහ කල් ඉකුත් වූ රටඉදි ගබඩාකර තිබූ ගබඩා කිහිපයක් පාරිභෝගික කටයුතු පිළිබද අධිකාරියේ ගම්පහ දිස්ත්‍රික් කාර්යාලයේ නිලධාරීන් විසින් වටලා තිබෙනවා.
මෙම වැටලීමේ දී ඉකුත් වූ රසායන ද්‍රව්‍ය‍ය ලීටර් 50ක් ද එම නිලධාරීන් විසින් සොයාගෙන ඇති බවයි වාර්තා වුණේ.
කැලණිය, පෙතියාගොඩ ප්‍රදේශයේ පිහිටි ගබඩා පරීක්ෂා කිරීමේ දී මෙම භාණ්ඩ තිගය සොයාගෙන තිබෙනවා.
ඊට අමතරව පෙරේදා (29) දිනයේ වත්තල ප්‍රදේශයේ ආනයනකරුවන් සහ තොග වෙළදුන් පවත්වාගන යනු ලබන ගබඩා පරීක්ෂාවේ දී කල් ඉකුත් නොවූ වියළි මිරිස් සමඟ ගබඩාකර තිබු කල් ඉකුත් වූ වියළි මිරිස් ටොන් හතරකට වැඩි ප්‍රමාණයක් ද
විමර්ශන නිලධාරීන් විසින් සොයාගෙන තිබෙනවා.
කල් ඉකුත් වූ භාණ්ඩ සමඟ කල් ඉකුත් නොවූ භාණ්ඩ ගබඩාකර තැබීම පාරිභෝගික කයුතු පිළිබද අධිකාරිය මගින් නිකුත්කරන ලද ගැසට් නිවේදනයකට අනුව වරදක් වන අතර, එම වෙළදුන්ට එරෙහිව ඉදිරියේදී නඩු පැවරීමට නියමිතයි.
කල් ඉකුත් වූ භාණ්ඩ තොරතුරු වෙනස්කරන ලද භාණ්ඩ උත්සව කාලසීමාව තුළ වෙළදපොළට එවීම සදහා කටයුතු කරන වෙළදුන් සහ ගබඩාකරුවන් සොයා තවදුරටත් වැටලීම් සහ විමර්ශන ක්‍රියාත්මක බවයි පාරිභෝගික කටයුතු පිළිබද අධිකාරිය සඳහන් කළේ.
එමෙන්ම සැපයුම්කරුවන් විසින් භාණ්ඩ ලබාදීමේ දී එවැනි භාණ්ඩ පිලිබදව සැළකිරීමත් වන ලෙසත්, එවැනි තොරතුරු වෙතොත් පාරිභෝගික කටයුතු පිළිබද අධිකාරියේ කෙටි දුරකථන අංකය වන 1977 වෙත ලබාදෙන ලෙසත් සිල්ලර වෙළදුන් සහ ගබඩා අශ්‍රිතව සේවය කරන සේවකයන්ගෙන් එම අධිකාරිය ඉල්ලා සිටිනවා.
