වසර දහයකට ආසන්න කාලයක් නාවික හමුදාවේ සේවය කර ලුතිනන්වරයකු ලෙස වැඩ තහනමට ලක් වූ හිටපු ජනපති මහින්ද රාජපක්ෂගේ පුත් යෝෂිත රාජපක්ෂ රුපියල් කෝටි ගණනින් අයථා වත්කම් රැස් කිරීම සම්බන්ධයෙන් තවත් නඩුවක් ඉදිරියේ දී ගොනු කරන බව නීතිපතිවරයා කරුණු දක්වමින් අද (27) කොළඹ මහේස්ත්‍රාත් අධිකරණයට දැනුම් දුන්නා.
නීතිපතිවරයා වෙනුවෙන් ජ්‍යෙෂ්ඨ නියෝජ්‍ය සොලිස්ටර් ජෙනරාල් දිලීප පිරිස් සඳහන් කර සිටියේ, 2006 නාවික හමුදාවට බැඳී 2016 වැඩ තහනමට ලක් යෝෂිත රාජපක්ෂ නම් සැකකරු 2013 වසරේ දී රුපියල් ලක්ෂ 500ක ඉඩමක් මිලදී ගැනීම, CSN නාළිකාව පවත්වාගෙන යමින් මුදල් රැස් කිරීම ඇතුළු තවත් විමර්ශන ගණනාවක් රහස් පොලිසිය සිදුකරන බවයි.
ඊට අදාළ නඩු නුදුරේ දීම අධිකරණයට ගොනු කිරීමට කටයුතු සම්පාදනය කරන බවයි ජ්‍යෙෂ්ඨ නියෝජ්‍ය සොලිස්ටර් ජෙනරාල්වරයා අධිකරණයේ දී සඳහන් කර සිටියේ.
රත්මලාන ප්‍රදේශයේ පිහිටි රුපියල් ලක්ෂ 340 කට අධික වටිනාකමින් යුත් ඉඩමක් මිලදී ගැනීම සම්බන්ධයෙන් යෝෂිත රාජපක්ෂට එරෙහිව ගොනුකර තිබූ නඩුව අද (27) කැඳවූ අවස්ථාවේ දී මෙම කරුණු ඉදිරිපත් කෙරුණා.
අද කැඳවූ මෙම නඩුවට අදාළව සැකකාර යෝෂිත රාජපක්ෂව රුපියල් ලක්ෂ 500ක ශරීර ඇප දෙකක් මත මුදාහැරුණු අතර, විදෙස් ගමන් තහනමක් ද පනවනු ලැබුවා.
