ලෝක ආහාර වැඩසටහනට (WFP) දක්වන දායකත්වයේ කොටසක් ලෙස රුසියාව ශ්‍රී ලංකාවේ ජනතාව වෙත සූරියකාන්ත තෙල් (sunflower oil) තොගයක් පරිත්‍යාග කර තිබෙනවා.
විටමින් සහ ඛනිජ ලවණවලින් පොහොසත් සූරියකාන්ත තෙල් ටොන් 352ක් පමණ ශ්‍රී ලංකාවට පරිත්‍යාග කර ඇති බවයි ශ්‍රී ලංකාවේ රුසියානු තානාපති කාර්යාලය සඳහන් කළේ..
මෙම පරිත්‍යාගය සනිටුහන් කිරීමේ උත්සවයට එක්වෙමින් රුසියානු තානාපති ලෙවන් ධගාරියන් (Levan Dzhagaryan) පැවසුවේ මෙය රුසියානු – ශ්‍රී ලංකා සබඳතා වර්ධනයේ සැබෑ ඓතිහාසික අවස්ථාවක් සනිටුහන් කරන බවයි.
රුසියානු විදේශ ප්‍රතිපත්තියේ එක් අරමුණක් වන්නේ ආර්ථික, සමාජීය, සංස්කෘතික සහ මානුෂීය ගැටලු විසඳීම සඳහා ජාත්‍යන්තර සහයෝගීතාව ප්‍රවර්ධනය කිරීම බව තානාපතිවරයා පෙන්වා දී තිබෙනවා.
රුසියානු සමූහාණ්ඩුව කිසි විටෙකත් පසෙකට වී නොමැති අතර තම රට මුහුණ දෙන අභියෝග මධ්‍යයේ වුවද මිත්‍ර රාජ්‍යයන්ට අඛණ්ඩව සහයෝගය ලබා දෙන බවයි ඔහු කියාසිටියේ.
මෙම සූරියකාන්ත තෙල් ලෝක ආහාර වැඩසටහනේ ශ්‍රී ලංකා නියෝජිතයන් හරහා ආර්ථික අර්බුදයෙන් විපතට පත් වූවන් සඳහා හදිසි මෙහෙයුමක් ලෙසට බෙදා හැරෙනු ඇති.
