සංචාරක නවසීලන්තය සහ ඉන්දීය කණ්ඩායම අතර පැවැත්වෙන තුන්වැනි සහ අවසන් ටෙස්ට් තරගයේ පළමු දිනය නිමාවන විට සිය පළමු ඉනිම පිතිකරණයෙන් අරඹා සිටින ඉන්දීය කණ්ඩායම කඩුලු 04ක් දැවී ලකුණු 86ක් ලබාගෙන සිටිනවා.
දෙරට අතර අද (01) තරගය ඉන්දියාවේ වන්කඩේ නුවර දී ආරම්භ වූයේ කාසියේ වාසියේ ජය කිවි නායක ටොම් ලැතම් හට හිමිකර දෙමින්.
ඒ අනුව ලැතම් තීරණය කළේ පළමුව පන්දුවට පහරදීමට‍යි.
කෙසේවෙතත් තරගයේ පළමු ඉනිම සඳහා කිවියන්ට පළමු දිනයේ; දිනය අවසන් වීමටත් පෙර සියල්ලන් ම ලකුණු 235කට දැවී ගියා.
කිවි ලකුණු පුවරුව වෙනුවෙන් වැඩිම ලකුණුලාභියා වූයේ ඩැරිල් මිචෙල්.
මිචෙල් ලකුණු 82 ක් සහ විල් යන්ග් ලකුණු 71ක් ලබා ගත්තා.
කිවියන්ගේ කඩුලු දඩයමේ දී ඉන්දීය පන්දු බලඇණියේ රවීන්ද්‍ර ජඩේජා ලකුණු 65කට කඩුලු 05ක් සහ වොෂින්ටන් සුන්දර් කඩුලු 04කට වග කීමට සමත් වුනා.
එක් කඩුල්ලක අයිතිය හිමිවූයේ අකාෂ් ඩීප්ටයි.
ඉන් අනතුරුව සිය පළමු ඉනිමට පිතිකරණය ඇරඹි ඉන්දීය කණ්ඩායමේ පළමු කඩුලු 02ක ලකුණු 50කට පෙර දැවී ගියා.
යශස්වි ජයිස්වාල් ලකුණු 30ක් ලබාගත්තා.
අද දිනයේ දීත් අසාර්ථක වූ කින්ග් කෝලි ලකුණු 04කට ක්‍රීඩාගාරයෙන් ඉවත් වූයේ දුවද්දී දැවී යාමකට හසුවෙමින්.
අජාස් පටෙල් කඩුලු 02ක් සහ මැට් හෙන්රි කඩුල්ලක් බිඳ දැමූ අතර ඉන්දීය කණ්ඩායම නවසීලන්තයට වඩා පළමු ඉනිමෙන් තවත් ලකුණු 149ක් පසුපසින් සිටිනවා.
හෙට (02) තරගයේ දෙවැනි දිනයයි.
