කුලියාපිටිය – හෙට්ටිපොළ ප්‍රධාන මාර්ගයේ කඹුරාපොල, බුජ්ගමුව පාලමෙන් සුඛෝපභෝගී V8 වර්ගයේ ජීප් රථයක් පෙරළී ගොස් සිදු වූ අනතුරකින් එකම පවුලේ සහෝදරයින් දෙදෙනෙක් ජීවිතක්ෂයට පත් වුණා.
මෙලෙස ජීවිතක්ෂයට පත් වූ තරුණයින් දෙදෙනා විදෙස් ගතව උසස් අධ්‍යාපනය ලබමින් සිටිය දී මීට සති දෙකකට පමණ පෙර දිවයිනට පැමිණ ඇති බවයි තොරතුරු වාර්තා වුණේ.
ජීවිතක්ෂයට පත් වූ සහෝදරයින් දෙදෙනාගෙන් 27 හැවිරිදි නිර්මාල් ධනංජය ජපානයේ උසස් අධ්‍යාපනය හදාරමින් සිට ඇති අතර 25 හැවිරිදි ඉෂාන්ත පියුමාල් ඕස්ට්‍රේලියාවේ උසස් අධ්‍යාපනය හදාරමින් සිට තිබෙනවා.
කුලියාපිටිය දෙස සිට හෙට්ටිපොල දෙසට ධාවනය වූ මෙම V8 වර්ගයේ සුඛෝපභෝගී ජීප් රථය අද (23) අලුයම එකට පමණ බුජ්ගමුව පාලමෙන් පහළට පෙරළී අනතුරට ලක්ව තිබුණා.
අනතුරින් පසු ජීප් රථය පැය හයක පමණ මෙහෙයුමකින් අනතුරුව ගොඩගත් අතර, ඒ වනවිටත් රථය තුළ සිරවී සිටි තරුණයින් දෙදෙනා ජීවිතක්ෂය පත්ව සිටියා.
ජීවිතක්ෂය පත්ව සිටි ඔවුන්ගේ සිරුරු රැගෙන ගියේ කුලියාපිටිය රෝහලටයි.
වෙන්නපුව ප්‍රදේශයේ පැවති සාදයකට සහභාගී වී යළි කොබෙයිගනේ ප්‍රදේශයේ පිහිටි නිවස වෙත යමින් සිටිය දී මොවුන් මෙම අනතුරට මුහුණ පා ඇති බවයි වාර්තා වුණේ.
මේ අතර අනතුර සිදුවන් අවස්ථාවේ දී මොවුන් දෙදෙනා බීමතින් සිට ඇත්ද යන්න අනාවරණය කර ගැනීම සඳහා පරීක්ෂා කිරීමට රුධිර සාම්පල ලබාගෙන ඇති බව පොලිසිය සඳහන් කළා.
