පොලිස් ලොක්කෝ ගන්න සමහර තීරණ නිසා පොලිස් පොඩ්ඩෝ හැමදාමත් අමාරුවේ වැටෙන සිදුවීම් ඕනේ තරම් අපිට අහන්න දකින්න ලැබෙනවා. පහත් තැනින් ජලය ගලා බසිනවා කියන කතාව අද සමාජයට කදිමෙට ගැලපෙනවා. සාමාන්‍ය මිනිස්සුන්ට වගේම පොලිසියේ නිලධාරීන්ටත් මේ කාලේ හරිම අමාරුයි.
කාටත් වගේ ඒ අයටත් ආර්ථික අමාරුකම් දැනෙනවා ඇති. මේ කියන්න යන්නේ ලොකු මහත්වරුන්ගෙන් බැනුම් අහන්න දඩුවම් විදින්න බැරි නිසා ලැබෙන වැටුපටත් තට්ටු වුණු සිදුවීමක් ගැනයි. ගලෙන්බිදුනුවැව පොලිසියේ මුදල් එකතු කිරීමක් සම්බන්ධව ඡායාරූපයක් අප වෙත ලැබුණා.එහි සඳහන්ව තිබෙන්නේ එක් එක් නිලධාරීන් ගෙවිය යුතු මුදලක් සම්බන්ධව පොලිසියේ පලකර ඇති දැන්වීමක් සම්බන්ධවයි.
කැබතිගොල්ලෑව ජ්‍යෙෂ්ඨ පොලිස් අධිකාරීවරයාගේ අර්ධ වාර්ෂික පරීක්ෂණය වෙනුවෙන් යන වියදම් සඳහා එහි නිලධාරීන්ගෙන් මෙම මුදල් අයකර ගැනීමට මෙම දැන්වීම පලකර තිබෙනවා.
කෙසේ වෙතත් පොලිසිය තුල එවැනි මුදල් එකතු කිරීමක් සිදුකළ නොහැකි බවයි අප පොලිසියෙන් කළ විමසීමකදී පැවසුවේ. මෙවන් අර්ධ වාර්ෂික පරීක්ෂණ සිදුකිරීමට පොලිසිය සතුව මුදල් නොමැති නිසාත් නිලධාරීන්ද අසරණභාවට පත්වන බව නොරහසක්. මක් නිසාද යත් ඉහළ නිලධාරීන් පැමිණි පසු ඉටියෙන් හෝ මැටියෙන් මෙය සිදුකර තිබිය යුතුවීම හේතුවෙන්. යම් හෙයකින් මෙය නිසි ආකාරයකින් සිදු කර ගැනීමට අපොහොසත් වුවහොත් අදාල නිලධාරීන්ට සිදුවන්නේ තමන්ගේ ෆයිල් එකට ලිපියක් යෑම හෝ ස්ථාන මාරුවක් ලබාගැනීමටයි.
එවන් පසුබිමක ඇතැම් නිලධාරීන් ප්‍රදේශයේ ව්‍යාපාරිකයන්ගෙන්, ලී මෝල්කරුවන්ගෙන්, වැලි ජාවාරම්කරුවන්ගෙන් හෝ නීති විරෝධී ව්‍යාපාර කරන පුද්ගලයන්ගෙන් අතමාරු ගැනීමට පත්වීම නැවතිය නොහැකිය.
තමන්ට ලැබෙන වැටුපෙන් පොලිසියේ වැඩ පවා මෙලෙස කිරීමට සිදුවීමද කණගාටුවට කරුණක්. කෙසේ වෙතත් මේ සම්බන්ධයෙන් අප කැබතිගොල්ලෑව පොලිසියෙන් කළ විමසීමකදී පැවසුවේ මේ සම්බන්ධ පරීක්ෂනයක් ඉදිරියේදී සිදුවනු ඇති බවයි.
