දකුණු දිග පාකිස්ථානයේ දුම්රියක් පීලි පැනීමෙන් අද සිදුවූ අනතුරෙන් ජීවිත අහිමිවූවන්ගේ සංඛ්‍යාව ඉහළ ගොස් ඇති බව වාර්තා වනවා.
ඒ, අනුව බී.බී.සී. පුවත් සේවය වාර්තා කළේ මෙම අනතුරෙන් මියගොස් ඇති සංඛ්‍යාව 30ක් දක්වා ඉහල ගොස් ඇති බවයි
.
එමෙන්ම තුවාල ලැබූ සංඛ්‍යාව ද 100 දෙනෙකු දක්වා ඉහළ ගොස් ඇති බවයි වාර්තා වන්නේ.
අනතුරට ලක්වූ දුම්රියේ මැදිරි තුළ ටවමත් පුද්ගලයින් සිර වී සිටින අතර, ඔවුන් බේරාගැනීමට මෙහෙයුම් ක්‍රියාත්මක බව සඳහන්.
පාකිස්ථානයේ විශාලතම නගරය වන කරච්චියේ සිට කිලෝමීටර් 275ක් පමණ දුරින් පිහිටි නවාබ්ෂා හි සහරා දුම්රිය ස්ථානය අසල දී හසාරා නැමැති සීඝ්‍රගාමී දුම්රිය පීලි පැනීමෙන් මෙලෙස අනතුරට ලක් වුණා.
එරට දුම්රිය අමාත්‍ය සාද් රෆීක් පැවසුවේ අනතුර සිදුවන අවස්ථාවේ දී දුම්රිය සාමාන්‍ය වේගයකින් ධාවනය වී ඇති බවයි.
කෙසේ වෙතත් දුම්රිය පීලි පැනීමට හේතුව කුමක්ද යන්න තවමත් තහවුරු කරගෙන නැහැ.
පකිස්ථානයේ ඉපැරණි දුම්රිය මාර්ග පද්ධතියේ අනතුරු සුලභව සිදුවන බවයි තොරතුරු වාර්තා වුණේ.
