මොරගහහේන පොලිස් වසමේ තල්ගහවිල, මාලොස්ඇල ප්‍රදේශයේ දී අද (07) දහවල් 12.45ට පමණ සිදුකළ වෙඩි තැබීමකින් පුද්ගලයින් දෙදෙනෙක් ජීවිතක්ෂයට පත් වුණා.
මෙලෙස ජීවිතක්ෂයට පත්ව ඇත්තේ මංකොල්ලයකට සම්බන්ධව ඇප මත මුදාහැර සිටි පුද්ගලයින් දෙදෙනෙක් බවයි වාර්තා වුණේ.
රත්නපුර ප්‍රදේශයේ රන් භාණ්ඩ අලෙවිසැලක් කොල්ලකෑමේ සිද්ධියක් සම්බන්ධයෙන් විභාග වෙන නඩුවක ඇප කොන්දේසියකට අනුව සෑම ඉරිදා දිනකම මොවුන් දෙදෙනාට රත්නපුර පොලිසියේ පෙනී සිටින ලෙස නියෝග කර තිබූ බව සඳහන්.
ඒ, අනුව මොවුන් දෙදෙනා රත්නපුර පොලිස් ස්ථානය වෙත ගොස් ත්‍රිරෝද රථයකින් නැවත පැමිණෙමින් සිටිය දී මෝටර් රථයකින් පැමිණි නාඳුන පිරිසක් විසින් මොවුන්ට වෙඩි තබා පළාගොස් ඇති බවයි පොලිසිය සඳහන් කළේ.
වෙඩි වැදුණු පුද්ගලයින් දෙදෙනා හොරණ මූලික රෝහල වෙත ඇතුළත් කිරීමෙන් පසු ජීවිතක්ෂයට පත්ව තිබෙනවා.
මෙලෙස මිය ගියේ 63/2, හිරිපිටිය, පන්නිපිටිය ලිපිනයේ පදිංචි රූපසිංහ අරාච්චිගේ නයනානන්ද පෙරේරා නැමැති අවුරුදු 52ක පුද්ගලයෙන් සහ 114/1, තානායම් ගොඩැල්ල, සිද්ධමුල්ල, පිළියන්දල ලිපිනයේ පදිංචි විතානගේ වසන්ත පෙරේරා නැමැති වයස අවුරුදු 50ක අයෙක්.
මේ අතර වෙඩික්කරුවන් පැමිණි මෝටර් රථයෙන් රත්නපුර සිට ම ත්‍රීරෝද රථය පසුපස පැමිණ ඇතැයි පොලිසිය සැක කරනවා.
මෙම වෙඩි තැබීම සඳහා මිලිමීටර් 09 වර්ගයේ ගිනිඅවියක් භාවිත කර ඇති බවයි පොලිසිය සඳහන් කළේ.
මොරගහහේන පොලිස් ස්ථානය සිද්ධිය සම්බන්ධයෙන් වැඩිදුර පරීක්ෂණ සිදුකරනු ලබනවා.
