බියගම, යටවත්ත ප්‍රදේශයේ නිවෙසකට එස්.ටී.එෆ්. එකෙන් බව පවසමින් අලුයම් කාලයේ ඇතුළු වී නිවෙස් හිමි කාන්තාව හා ඇගේ මව බිය ගන්වා රුපියල් පනස් අට දහසක් සමග රන් ආභරණ කොල්ලකා ගිය පස්දෙනෙකු බියගම පොලිසිය පෙරේදා (23 වැනිදා) රාත්‍රියේ අත්අඩංගුවට ගත්තේය.
කොල්ලකරුවන් ළඟ තිබී රුපියල් එක් දහස් පන්සිය විස්සක්, ස්මාර්ට් ජංගම දුරකථන හතරක්, රිදී අත් පලඳනා දෙකක් හා රිදී මුදුවක් සොයා ගෙන තිබේ. ප්‍රධාන පොලිස් පරීක්ෂක ඒ.ජේ.එම්.ආර්. සමරසිංහට ලද තොරතුරක් මත කොල්ලය සැලසුම් කරන ලද කොට්ටුන්න පාරේ හෝටලයක කොත්තු බාස් අත්අඩංගුවට ගෙන ප්‍රශ්න කිරීමෙන් පසු සෙසු හතරදෙනාද අත්අඩංගුවට ගෙන ඇත.
නිවෙස කොල්ලකා ගෙන පලා යන අවස්ථාවේ කොල්ලකරුවන් නිවැසියන්ට කියා ඇත්තේ කොළඹ, බෞද්ධාලෝක මාවතේ එස්.ටී.එෆ්. කඳවුරට එන ලෙසටය. නිවැසියන් උදෙන්ම එහි යාමෙන් පසුව මෙය කොල්ලයක් බවට තහවුරු වී තිබේ. සැකකරුවන් මත්කුඩුවලට තදින්ම ඇබ්බැහිවුවන් වන අතර ඔවුන් මත්කුඩු හා විවිධ අපරාධ සම්බන්ධව චෝදනා ලැබ සිර දඬුවම් විඳ හා ඇප මත මුදා හැර සිටින අය වෙති.
wpDiscuz
