2026 සඳහා වූ ජාතික විගණන කාර්යාලයේ වාර්ෂික වැඩසටහනේ ප්රගතිය සම්බන්ධයෙන් විගණකාධිපති සමුදිකා ජයරත්න ඇතුළු නිලධාරීන් පිරිසක් රජයේ මුදල් පිළිබඳ කාරක සභාව දැනුවත් කිරීම සිදුවුණා.
ඒ, පාර්ලිමේන්තු මන්ත්රී ආචාර්ය හර්ෂ ද සිල්වාගේ සභාපතිත්වයෙන් සහ නියෝජ්ය අමාත්යවරුන් වන චතුරංග අබේසිංහ, නිශාන්ත ජයවීර, සහ ගරු පාර්ලිමේන්තු මන්ත්රීවරයන් වන රවී කරුණානායක, හර්ෂණ රාජකරුණා, චම්පික හෙට්ටිආරච්චි සහ ලක්මාලි හේමචන්ද්ර යන සහභාගීත්වයෙන් රජයේ මුදල් පිළිබඳ කාරක සභාව පාර්ලිමේන්තුවේදී පසුගියදා (02) රැස් වූ අවස්ථාවේදී යි.
මෙහිදී සමෘද්ධි බැංකු විගණනය කිරීම සම්බන්ධයෙන් සාකච්ඡා වූ අතර, පැමිණි නිලධාරීන් පෙන්වා දුන්නේ 2025 වර්ෂයට අදාළ විගණනය කිරීම සඳහා 2023 සහ 2024 වර්ෂවල විගණන දෙක අවසන් කළ යුතු බවයි.
එම විගණනයන් බාහිර පාර්ශ්ව වෙත පැවරීමේ ප්රසම්පාදන කටයුතු මෙතෙක් අවසන් වී නොමැති බව නිලධාරීන් මෙහිදී පැවසුවා.
මෙම කටයුතු සඳහා නිලධාරීන් 300ක් පමණ අවශ්ය බව ඇස්තමේන්තු කර තිබුණද, වසර 1 1/2ක් තුළ මේ සඳහා නිලධාරීන් 200ක් බඳවා ගැනීම ප්රමාණවත් බව විගණකාධිපතිතුමිය මෙහිදී පැවසුවා.
එසේම, මෙම බැංකුව විගණනයට අදාළව නිශ්චිත ක්රමවේදයක් (Frame Work) නොපවතින බවද නිලධාරීන් අවධාරණය කළා.
මේ අනුව, මේ පිළිබඳව අධ්යයනය කර සමෘද්ධි බැංකු හා සමිති විගණනය කිරීම සඳහා අවශ්ය ක්රමවේදය යෝජනාවක් ලෙස කාරක සභාව වෙත ඉදිරිපත් කරන ලෙස කාරක සභාවේ සභාපතිවරයා නිර්දේශ කළා.
තවද, සයිබර් ආරක්ෂණ (Cyber Security) ක්රියාවලිය සම්බන්ධයෙන් ද මෙහිදී අවධානය යොමු වූ අතර විගණන කටයුතු සඳහා තොරතුරු තාක්ෂණ විශේෂඥයින් දෙපාර්තමේන්තුවේ නොමැති බවත්, පද්ධති විගණනයේදී එය බාහිර පාර්ශ්ව (External Auditors) විසින් සිදු කරන බවත් ජාතික විගණන කාර්යාලයේ නිලධාරීහු වැඩිදුරටත් පැවසුවා.
මීට අමතරව රී බිල්ඩින් ශ්රී ලංකා (Rebuilding Sri Lanka) වැඩසටහනට අදාළ ගිණුම සම්බන්ධයෙන්ද සාකච්ඡා කිරීම සිදුවුණා.
Rebuilding Sri Lanka යනුවෙන් ව්යවස්ථාපිත අරමුදලක් නොමැති බව එහිදී අනාවරණය වූ අතර, මෙය භාණ්ඩාගාර නියෝජ්ය ලේකම් යටතේ තිබෙන ගිණුමක් පමණක් බව ජාතික විගණන කාර්යාල නිලධාරීන් පෙන්වා දුන්නා.
එසේම එමගින් මෙතෙක් කිසිදු ගෙවීමක් සිදු කර නොමැති බවත් නිලධාරීහු පවසා සිටියා.
