බරහිර ඉන්දීය සුපිරි තුන් ඉරියව් ක්‍රීඩක ඩ්වේන් බ්‍රාවෝ ඉන්දීය ප්‍රිමියර් ලීග් තරගාවලියෙන් විශ්‍රාම යන බව ඊයේ නිල වශයෙන් දැනුම් දුන්නා.
වසර 15ක පමණ කාලයක් අඛණ්ඩව අයි.පී.එල්. තරගාවලිය නියෝජනය කළ බ්‍රාවෝ ඉන් වසර 10ක පමණ කාලයක් සිය දායකත්වය චෙන්නායි සුපර් කිංග්ස් කණ්ඩායම වෙනුවෙන් සැපයනු ලැබුවා.
කෙසේ වෙතත් 2023 තරගාවලියට අදාළ ක්‍රීඩක වෙන්දේසිය වෙනුවෙන් බ්‍රාවෝව නිදහස් කිරීමට චෙන්නායි කණ්ඩායමේ කළමණාකාරීත්වය පසුගිය දා තීරණය කළා.
කෙසේ වෙතත් මෙවර අයි.පී.එල්. තරගාවලියට අයදුම්කළ ක්‍රීඩකයින් අතර, ඩ්වේන් බ්‍රාවෝ දක්නට නොලැබීමත් සමඟයි මේ පිළිබඳව දැඩි කතා බහක් මතු වුණේ.
ඒ, අනුව ක්‍රිකට් විචාරකයින් මත පළ කළේ බ්‍රාවෝ නොදන්වාම අයි.පී.එල්. තරග බිමට සමුදී ඇති බවයි.
විචාරකයින් මතය තහවුරු කරමින් ඩ්වේන් බ්‍රාවෝ ඊයේ සඳහන් කළේ තමන් ඉන්දීය ප්‍රිමියර් ලීග් තරගාවලියෙන් විශ්‍රාම ගන්නා බවයි.
බ්‍රාවෝගේ මෙම තීරණයත් සමඟ මීට පෙර ක්‍රීඩක වෙන්දේසිය වෙනුවෙන් ඔහුව කණ්ඩායමෙන් නිදහස් කර තිබූ චෙන්නායි පිළ යළිත් ඔහුව කණ්ඩායමට කැඳවා ගන්නට තීරණය කර තිබෙනවා.
ඒ, 2023 තරගාවලිය තුළ ක්‍රීඩකයෙකුට එහා ගිය වගකීමක් ඔහුට පවරමින්.
ඒ, අනුව චෙන්නායි සුපර් කිංග්ස් කණ්ඩායමේ හිමිකාරීත්වය මේ වනවිට තීරණය කර ඇත්තේ 2023 ඉන්දීය ප්‍රිමියර් ලීග් තරගාවලියේ දී බ්‍රාවෝ සිය කණ්ඩායමේ පන්දු යැවීමේ පුහුණුකරු තනතුර සඳහා පත් කිරීමටයි.
