විරෝධතාකරුවන් අතරට පැමිණි සමඟි ජනබලවේග පාර්ලිමේන්තු මන්ත්‍රී රාජිත සේනාරත්නට ඊයේ (09) දිනයේ දී අනපේක්ෂිත ප්‍රහාරයකට මුහුණ දීමට සිදුවුණා.
එහිදී ඔහුගේ ආරක්ෂකයින් පියවර ගත්තේ රාජිත සේනාරත්නව විරෝධතාකරුවන් අතරින් ඉවත්කර ගැනීමටයි.
මේ අතර තමාට එල්ල වූ අනපේක්ෂිත ප්‍රහාරය සහ අරගලය සම්බන්ධයෙන් රාජිත සේනාරත්න මන්ත්‍රීවරයා ව්ශේෂ සටහනක් සිය ෆේස්බුක් ගිණුමට එක්කර තිබෙනවා.
එහි ඔහු සටහන් කර ඇත්තේ තමන්ට සිදුකළ පහරදීම හේතුවෙන් අරගලය පිළිබඳව තිබෙන ආකල්පය බිඳකින් හෝ වෙනස් වී නොමැති බවයි.
මන්ත්‍රීවරයා සිය ෆේස්බුක් ගිණුමට එක්කර තිබූ සම්පූර්ණ සටහන පහතින්.
යම් පුද්ගලයෙක් හෝ
යම් පිරිසක් විසින්,
මට සිදුකල පහරදීම නිසා, අරගලය ගැන
මගේ තිබෙන ආකල්පය බිඳකින් හෝ වෙනස් වෙන්නේ නැහැ…
මෙය ලංකා ඉතිහාසයේ සිදුවූ,
සුවිශේෂීම දේශපාලන අරගලයයි.
ඒකාධිපති
රාජපක්ෂ පවුල් පාලනය,
මැතිවරණයකින්
පරාජය කිරීමෙන්
අවසන් නොවන බව,
2015 – 2019 කාලයේදී
අපි දැක්කා…
ඒකාධිපති වියරුවක් තිබෙන,
මේ වගේ පවුල් පාලනයක් අවසන් කරන්න පුළුවන්කම තියෙන්නේ,
විශාල මහජන නැගිටීමකින් විතරයි..
ඒ ගැන,
ලෝක දේශපාලන ඉතිහාසයේ ඕනෑ තරම් උදාහරණ තිබෙනවා..
මිනිස්සු විවිධයි.. විෂමයි. ඔවුන්, කැමති අය..
අකමැති අය විවිධයි.
මට ප්‍රහාරය එල්ල කළ පුද්ගලයන්ගේ අරමුණ,
හොඳ රටක් නිර්මාණය කිරීමදැයි
මගේ සිත ප්‍රශ්න කරයි.
මා විසින් මිළ අඩුකළ, බෙහෙත් පෙත්තක් බීපු මිනිස්සු ඔවුන්..
මා විසින් නොමිලයේ දීමට තීරණය කළ,
ස්ටෙන්ට් වලින්
ජීවිත බේරාගත් දෙමාපියන්ගේ
දරුවන් ඔවුන්.
මා විසින් නොමිලයේ දීමට තීරණය කළ,
අක්ෂි කාචවලින්
පෙනීම ලැබූවන්ගේ නෑදැයන් ඔවුන්.
මම, කිසිවෙකුට
වෛර කරන්නේ නැහැ…
ශුද්ධ වූ අරගල කියා එකක් ලෝකයේ නැහැ..
ශුද්ධ වූ අරමුණු පමණයි ලෝකයේ තිබෙන්නේ..
ඒ ශුද්ධ වූ අරමුණු කරා යන ගමනේදී,
අපහාස විඳීමට.. පහරකෑමට..
ඝාතනයට ලක්වීමට වුවත්
ඉඩ තිබෙනවා..
නමුත් ඒ කිසිවක් අවසානයේදී වැදගත් වෙන්නේ නැහැ.
වැදගත් වෙන්නේ,
අරමුණ ඉෂ්ට වූවාද? අරගලය
ජයග්‍රහණය කළාද?
යන්න පමණයි.
අරගලයේ ජනතා සටන,
අපි දැන් ජයග්‍රහණය කර අවසන්.
බස්වල කෝච්චිවල එල්ලීගෙන,
හැතැප්ම ගණන් පා ගමනින් පැමිණ,
ඊට සහාය දුන් සියලු දෙනාට මම සුබපතන්න කැමතියි..
ඔබ සැමට, මාගේ ආචාරය! වෛද්‍ය රාජිත සේනාරත්න
