හය වැනි ශ්රේණියේ ඉංග්රීසි මාධ්යයෙන් ඉගෙනුම ලබන එකොළොස් හැවිරිදි (11) දියණියට, එම විදුහලේ බටහිර සංගීතය උගන්වන සෞන්දර්ය ගුරුවරිය අමානුෂික අන්දමින් (පංති කාමරයේ දී) පහරදීමේ පුවතක් වාර්තා වනවා.ඒ මහරගම ප්රසිද්ධ බාලිකා විද්යාලයකයි.පාසල අවසන් වී නිවසට පැමිණි දියණිය දැඩි ලෙස රෝගාතුර වූයෙන් පවුලේ වෛද්යවරයාගේ උපදෙස් මත කළුබෝවිල රෝහලට ඇතුළු කිරීමෙන් අනතුරුව සිදුවුණු තුවාලවලට සහ පහරදීමෙන් ඇතිවුණු මානසික පීඩාවට, එම රෝහලේ මානසික වෛද්යවරයා යටතේ උපදේශන සේවාව ලබාගන්නා අතර, ඇය දැනට මහරගම බණ්ඩාරනායක ආයුර්වේද රෝහලේ වෛද්ය ප්රතිකාර ලබමින් පසුවන්නීය.පසුගිය අට වැනිදා (8) පෙරවරුවේ, විදුහලේ පංති කාමරයේදී ටීචර්ගේ පහරකෑමට ලක්වුණු මෙම දැරිය, එම පහරේ වේදනාව දරාගෙන පංති කාමරයේ සිට ඇත. ඇයට ප්රතිකාර ලබාදීමට වගකිව යුතු කිසිවකු යොමු වී නැත. පාසල අවසන් වී මව සමග නිවසට පැමිණි මෙම දැරිය, තමුන්ට ටීචර් පහර දුන් බව ප්රකාශ කර තිබේ. ඒ තුවාල නිසා ඇතිවූ වේදනාවෙන් නිවසේ පසුවුණු අවස්ථාවේ, මව ඒ ගැන විමසූ විටය.
පහරදුන් අවස්ථාවේ, මෙම සිද්ධිය ඇස දුටු දියණියන් කිහිප දෙනකු මාධ්යයට පවසා සිටියේ මෙවැන්නකි.
“ටීචර්, එක දිගට පිට මැද්දට පහර දෙන කොට, මට බලාඉන්න බැරි හින්ද ඇස්දෙක පියාගත්තා.”, “ටීචර් පහරදෙන කොට මම හිතුවා මෙයා මැරේවි කියලා.”,
“ටීචර් දහයක් පහළොවක් විතර ගහන්න ඇති.” මෙම හිංසනය සිදුවුණු අවස්ථාවේ, පංතියේ සිටි සිසුවියන්ගේ ඇස දුටු සාක්ෂි කිසිවක්, මහරගම පොලිසියේ කාන්තා අංශයේ නිලධාරිනියන්, මේ දක්වා සටහන් කරගෙන නැතැයි මව කියයි.
