රටේ ඉස්සරහට නැති වෙන්නේ කන්න ටික විතරක්ම නෙමෙයි….

මේ දිනවල ශ්‍රී ලංකාවේ බොහෝ දක්ශ වෘතිකයන් වේගයෙන් රට අත්හැර යනවා.මේ ඒ හැර යාමත් සමග අපේ රටේ ඇතිවෙන බුද්ධිමත් මිනිසුන්ගේ අඩුපාඩුව ගැන කතාවක්.මේ සටහන මුහුනුපොතේ තබා තිබුනේ දොස්තර වෛද්‍ය චන්දිම ජයසිංහ මහතායි.

සිදුරුවූ හදවත

පසුගිය දවසක ළමා රෝග සායනයේ මාත් තව වෛද්‍යවරයෙකුත් සුපුරුදු පරිදි රෝගී දරුවන් පරික්ෂා කරමින් සිටියා. මේ අතර වයස මාස 6ක් පමණ වන ළදරුවෙකුත් ව‍ඩාගෙන අම්ම කෙනෙක් ඇතුලට ආවා.

“ඩොක්ට බබාගේ පපුවේ සිදුරක් තියෙනවා කියල ඉ‍පදෙද්දි කිව්වා, ඒක වැහිලද බලන්න මාස 6කින් 2D Echo පරීක්ෂණය ආපහු කරන්න කිව්වා. Echo කාමරයට ගියාම කිව්වා මේක කරන්න ඉල්ලපු ඩොක්ට දැන් නෑ, රට ගිහින් කියලා. අපිට මේක private හරි කරගන්න තැනක් කියනවද?”

ඒ අම්මා බැගෑපත් උනා.

ලංකාවටම ළමා හෘදරෝග විශේෂඥ වෛද්‍යවරු ඉන්නේ 10 දෙනයි. මේ අඩුපාඩුව නිසා එවැනි වෛද්‍යවරු නැති‍ රෝහල් වල සමහර වැඩිහිටි හෘදරෝග විශේෂඥ වෛද්‍යවරු උදව්වක් විදියට හදිස්සි අවස්ථා වලදී දරුවන්ගේ 2D Echo පරීක්ෂණ කරලා දෙනවා. මේ වගේ උදව් කරපු වෛද්‍යවරයෙක් පහුගිය දවසක අපේ රටට අහිමිවුනා.

බුද්ධි ගලනය කියන්නේ විහිලුවක් නෙවෙයි. ලංකාවේ වෛද්‍යවරයෙකුට ඉතා පහසුවෙන් විදෙස් රටක, ලංකාවේ ගෙවනවා වගේ කීප ගුණයක වැටුපකට ඉතා සුවපහසු ජීවිතයක් ගත කරන්න පුලුවන්. මේ මාසයේ සිට ක්රියාත්මක වුන සියලු සෞඛ්‍ය සේවකයින්ගේ වැටුප් කප්පාදුවත් එක්ක, මේ රටේ ඉහළ යන ජීවන වියදමත් එක්ක තවදුරටත් ජීවත් වෙන්න පුලුවන්ද කියන එක අපි කාගෙත් හිත යට පත්තු වෙන, නිවෙන්නේ නැති ගින්දරක්.