ශ්‍රී ලංකාව සහ තුර්කි ජනරජය අතර පැවැත්වෙන ආර්ථික සහ සහයෝගීතාවය සදහා වූ ඒකාබද්ධ කමිටුවේ 03 වන සැසිවාරයට සහභාගී වීම සදහා තුර්කි ජනරජයේ අධ්‍යාපන අමාත්‍ය යූසුෆ් ටෙකින් අද (24) අලුයම දිවයිනට පැමිණියා.
වෙළෙඳ අමාත්‍යාංශයේ වානිජ දෙපාර්තමේන්තුව විසින් සංවිධානය කරන මෙම සමුළුව අද (24) දින කොළඹ හිල්ටන් හෝටලයේ පැවැත්වීමට නියමිතයි
එහිදී දෙරට අතර වෙළෙඳ, ආයෝජන, සංචාරක, අධ්‍යාපන, තාක්ෂණික සහ තවත් ක්ෂේත්‍ර ගණනාවක සහයෝගීතාවය ප්‍රවර්ධනය කිරීමට නියමිතව තිබෙනවා.
දෙදින නිල සංචාරයක් සඳහා පැමිණි තුර්කි අධ්‍යාපන අමාත්‍යවරයා සමඟ තවත් 08 දෙනෙකුගෙන් යුතු එරට ඉහළ පෙළේ ව්‍යාපාරික දූත පිරිසක් ද පැමිණ සිටියා.
මෙම පිරිස අද (24) දින අලුයම 05.05ට තුර්කියේ ඉස්තාන්බුල් නුවර සිට තුර්කි ගුවන් සේවයේ ටී.කේ.- 730 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
ඔවුන් පිළිගැනීම සදහා වෙළෙඳ, වානිජ ,ආහාර සුරක්ෂිතතා සහ සමූපකාර සංවර්ධන පිළිබද නියෝජ්‍ය අමාත්‍ය ආර්.එම්.ජයවර්ධන මෙන්ම ශ්‍රී ලංකාවේ තුර්කි තානාපති සෙමි ලුට්ෆු ටර්ගුට් ද කටුනායක ගුවන් තොටුපොළ වෙත පැමිණ සිටියා.
තුර්කි අධ්‍යාපන අමාත්‍යවරයා ඇතුළු පිරිස මෙම සමුළුවට සහභාගී වී ඉන් අනතුරුව අග්‍රාමාත්‍යවරිය සහ ජනාධිපතිවරයා හමුවී ඔවුන් සමඟ ද සාකච්ඡා කිරීමට නියමිතයි.
